2027 nung caste enumeration dena census agitsü

New Delhi, June 5, 2025 (Agencies): India sorkari 2027 küm taruba nationwide population census agitsü aser tang mezüng atema iba nung caste enumeration adentsü ta Bodbarnü metetdaktsüogo.

Iba census exercise ya shilem ana lemsar agitsü aser reference date ji March 1, 2027 asütsü.

Ajisüaka, Ladakh, Jammu and Kashmir, Himachal Pradesh, aser Uttarakhand ama rü alaba tesemtem nungbo census maparen jelia inyaktsü aser reference date October 1, 2026 asütsü ta Centre-i metetdaktsüogo.

Caste enumeration dena 2027 Census agitsüba ya June 16, 2025 nü Gazette of India nung sangdongtsü imlar.

Census Act, 1948 aser Census Rules, 1990 nung ajemdaker India nung küm ter shia national census agir aser tang mezüng atema census nung caste enumeration adentsü. Political party aser state aikati policy planning aser welfare distribution nung yariteptsü atema caste census agitsü takhangba agüja arur tang mezüng atema iba ya inyaktsü sentong atongogo.

India nung population census tesüsabuba agibaji 2011 nung liasü. Iba mapang 2010 nung house listing inyak aser 2011 tetenzüklen enumeration maparen tenzüka liasü. 2011 ajanga linük nung nütsüng yongsük crores 121 tema bendena liasü aser iba ya growth rate 17.7% liasü.

2021 Census agitsü maparen ajunga renemer liasü saka Covid-19 wara ajanga magiteti thinentsüsa aküm.

2027 Census agiba sülen delimitation exercise ka inyaktsü aser iba ajanga Lok Sabha aser Assembly constituency tem lemsashitsü.

India nung census agiba shia Constitution nung lateta aliba ama delimitation maparen inyaka aru saka 1976 nungi iba mapa meinyaki dang arur. Centre sorkari iba mapangji population control ajungkettsü aser higher birth rates aliba state tem azüoktsü atema delimitation maparen meinyak.

Iba ya 2001 tashi atema mapang züngzüka liasü saka ibaji 2026 tashi atsülang. Iba ajanga 1971 census nung dang ajemdaker Lok Sabha menden 543 dang arur saka nütsüng yongsükbo anasü agi teimba kümogo.

2001 census sülen constituency telongtet aser Scheduled Castes & Tribes atema reserved seats reprangshiogo, saka menden memelenshitsü. Tang 2026 nung kümsük tembangtsü lir aser 2027 nung census agiba ajanga full delimitation asütsü lenmang lapoker.

Parliament building tasenba ya MP 888 atema yanglua lir aser iba jagi nisungtemi menden teimba akümtsü amanger. Ajisüaka, iba ama temelenshi lira Constitution yanglushitsüsa akümtsü kechiyong Lok Sabha menden atema limit 550 dang lir.