ADC Office & Hr. Secondary block semzükogo

Dimapur, Chiteni/July 6 (TYO): Tawa yangluba Additional Deputy Commissioner’s Office Complex aser Government Higher Secondary School (GHSS), Tening Higher Secondary Block semzükba sentong July 3 nü Town Hall nung agiogo.

Iba sentong nung CAWD & Taxes, Kudecho Khamo aser MLA, Namri Nchang mejeta jaoker aser tetushi tejaoker liasü.

Sentong nungsa ketdangsürtem aser jila nung alirtemi shilem agia liasü. Advisor, Kudecho Khamo-i ki anaprongla semzükja liasü, koba Tening subdivision atema alizüng tasen ka tongtetba asütsü.

Sentong nung o jembiba mapang Khamo-i, kitem semzüktsütsü atema pa nem maongka agütsüba atema kanga pelaba lemsatep. Paisa, senso tajungtem dang sorkar meyong kiojentem ya meraketa amshitsü ajungshiba den, Tening tebor ajungba aser terenlok asoshi lenmang sadema lapoka aliba indang jembia liasü.

Paisa, sorkar mapa dak dang metaloker malitsü ajungshiba den, tangbo yimsüsüba nung ochishibaji teyongtsü lir aser nüburtemi lenla ajak nung temaba jenjang tongtettsü atema merangtsüla, ta shisem.

Kasa mapang nung MLA, Namri Nchang-i, administrative aser educational infrastructure jenjang ajungketja iba tesem terenlok atema jenjang agiba atema sorkar dang kanga pelaba lemsatep.

Paisa, iba terenlok sülen lenmanga tajungba küma yanglutsü imlaba lemsatep, koba mapang talangka sentoka aruogo. Pai ashiba agi, lenmang tajungba küma yanglutsüba ajanga nüburtemi mapang talangka nungi yongya aliba nükjidong ataloktsüba dang masü saka iba ajanga senzüsenpong nung mapang tajemba kümdakja rongsenketzüng terenlok nunga teyari agütsütsü aser kidanger jila aser yimtitem den tajungba sendakteptsütsü.

Sentong nung Peren Deputy Commissioner Hiazu Meru aser Assistant Chief Engineer (CAWD), Er. Sungtiba Amer natia o jembia liasü.

Maneni sentong nung Rev. Kamwang Rentta-i Tsüngrem temoatsü meshizüka sarasadem aser ADC Tening, K. Furhesie Nyuwi-i lokti pela agizükba o jembia liasü. Sentong nungsa GHSS, Tening Vice Principal Rosca Jimo-i tepela o jembi.