Dzu ayong nung mejangjaba nisung teret ka nguteta lir

Dimapur, Chiteni/July 6 (TYO): July 5 nü nikongtsütsü 5 ako shi nung Dzu ayonglanglen Zero Point nung Chedema anasa mejangjaba nisung ka teret nguteta lir, ta ketdangsür sangdong ka ajanga metetdaktsü.

Inyakyim dak ajemdaker teret ya shia aruogo. Kanga junga bushisüngdangba den post-mortem examination ka agiba sülen teret ya arishi küm 25 nungi 30 tsüngda aliba tetsür ka indang asütsü ta jangjaogo.

Temzüng ozüng kübok tinyaktsü maparen ajak tembanga inyakogo. Teret ya tang North Police Station, Kohima indang morgue nung yua lir aser maitsü jangjatsü merangdar.

Iba dak sendakba nung Kohima Police-i nüburtem dang teyari meshiogo. Kija aser kibong kari danga nisung samaba indang aser talisa Chedema aser Dzu ayong temeket nung samaba indang osang agütsür lira aser parnoki bushiba nisung asütsü ta bilemra tejakdangi arutsü mepeshia metetdaktsüogo.

Karidanga ken o dak sendakba nung osang kar danga meteta lira parnok dang North Police Station, Kohima den iba number: 7005986018 ajanga tongteprateptsü mepeshia metetdaktsüogo.

Maneni nisung samaba indang osang kar danga meteta lira, nisungba ya kodang sama, terparngtsü koma aser tatemsa kong angu ibala mesükba osang metetdaktsütsü mepeshia metetdaktsüogo. Nüburtemi teyari agütsüba ajanga ketdangsürtem nem asür maitsü jangjatsü atema teyari agütsütsü aser kinungertem nem agütsütettsü, ta kasa sangdong ajanga metetdaktsü.