Assam: Amit Shah-i opposition party tem aitsü

Guwahati, Luroi/August 29 (Agencies): Bihar nung rally ka agiba mapang Congress aser Rashtriya Janata Dal (RJD) lenirtemi Ato Kilonser Narendra Modi tetsü asür Hiraba tiluja jembiba atema Union Home Minister Amit Shah-i Hokolbarnü parnok aitsüogo.

Guwahati nung Raj Bhavan, Brahmaputra Wing lapokba sentong nung o jembiba mapang Shah-i, iba amala o jembiba ya politics nung ajak dang tekübokba jenjangi ajemzüka aluba lir ta ashiba den, Congress lenir  Rahul Gandhi aser par party dang Ato Kilonser, pa tetsü aser lisopurtem  dang tatok meshitsü shiogo.

“Election ya democracy temulung lir. Electoral rolls nung ozüng alema arurtem tenüng züngoksema lira aser election inyakyim menena lira linük kodaser kümzüka litettsü? PM Modi tetsü kanga tongmelang taküm ka ali aser ajemalua lar chirnurtem anitetogo aser parnok rongnung ka alima nung nüngtugu lenir rongnung ka aküm. Yimden yimsüsüba sabang ka nungi la aitsüba ya taktsüka,” ta Shah-i ashi.

“Congress lenirtemi iba amala o jembia nüburtem atsüa arutettsü ta bilemer asü? PM koda taliba tilutsür yamaji Lotus taliba apongtsü ta metetdaktsüner,” ta pai ashi.

Shah-isa, Opposition-i Bharat Jodo Nyay Yatra ayongzüka agiba aitsüogo aser ashiba agi, iba ya “Ghuspaithiya Bachao Yatra” (Save Infiltrators March) ka lir, koba Congress indang vote bank kümzüka ayutsü atema political campaign ka lir.

Student politics indang bilemtetshia jembiba mapang Shah-i, küm aika tejakdang Akhil Bharatiya Vidyarthi Parishad (ABVP) rally mapang pai Assam semdang, kong Punjab aser Assam police-i longkak aita aliba kaketshirtem dak züka liasü, ta ashi.

Iba mapang den medemdangra Assam kanga renlokogo aser iba ya PM Modi aser CM Himanta Biswa Sarma na lenisüba nung ataloka odar, ta pai ashi.