Temesepba chiyungtsü nungi jenbua alitsü tesayuba sentong agi

Impur, Luroi/August 29 (TYO): Temesepba chiyungtsü nungi jenbua alitsü tesayuba sentong ka, “Jeretperet Lenwar” (Tenüngsang Ken 119:5) omen nung ajemdaker August 28 & 29, 2025 anogotem nung Impur nung Literature & Education Ministry, ABAM ajanga ayongzükaa agiogo, ta ABAM Executive Secretary, Rev. Temsü Jamir-i sangdong ka ajanga metetdaktsü.

Iba sentong ya Asso. Pastor Christian Education Ministry (APCEM) Zone 1-5 asoshi liasü.

Temesepba chiyungtsü achi ajemba ya tanü tanurtem tarutsü taküm raksatsüba tsükchir ka lir. Jangratem agütsüba temesepba mozü tapu balala aser külem medemertem tashi onsara tulu asünung, tapet anepaluba tajung magütsüra tarutsü putu nükla kecha meli kümogo. Tanurtem kümzüka ayutsü asoshi APCEM dak shilem tulu ngua iba sentong ya APCEM asoshi agia liasü.

Mr. Maong Jamir, Secretary of Finance & Property at ABAM, shisalen sayur liasü. Pai nendaka ashiba O kaji, Arogo nung talisa toklanga tenzükertemi Drug addiction aser temesepba chiyungtsü chia ajemba kulitem meteta alinungbo, iba tebilemtsü ya khenyongi tajemba akümtsü, ta ashi.

Pai sayuba rongnung tongtibangtemji, Temesepba chiyungtsü amshiba ajanga teraksa adokdaktsüba, Yimya sübaba pur anepaluyim tenrentem, addiction angatetyim, Addiction jenjangtem, tekolok yimya aser Temesepba chiyungtsü amshiba ,soft drugs, tanaben meyipa oa chia ajemba ya tekolok tashidak aser temesepba chiyungtsü amshiba toktsüba mapang timtem liasü.

Paisa APCEM dang, nenoki bendanga agüja tenzükba ajanga tarutsü putu nung tesasa maliba lanurtem asütsü nükla tulu yuang, ta ayongzük.

Rev. Temsü Jamir, Executive Secretary of ABAM, ajanga APCEM dang nenok wadang nung tayimjemba nung inyaka aotsü asoshi, angazüktsü jangraba, angazükbatem intoktsü tashi, aser maneni angazükshiba taküm kaka süang ta ashi.

Pei tajaba nükjidong tejangja metetba ajanga na ya shibaar nai metettsü, koba ajanga nai Tsüngremer nükjidong tejangjaba nung mulung lemteta wadang inyaktettsü, ta paisa ashi. Tanurtem tangatetbatem meteta nü wadang inyakang, kechiaser tanü putu tanurtemji khenyongi shisatsü balaka lir. Teti inyaka aruba yimya nungi alia oa tanurtem den koda ochiba nung par tebilemba den medemdanga inyaktsü, ta asüba nung inyaktsü pai ajungshi. Tanurtem nem shisatsü inoktsüba kisüng mesüi parnok ajungmesotettsüsa par yimya angateta tenzüktsü pai ajungshi.

Ajak agi Arogo 46 nungi APCEM 46 arua iba sentong nung aden. Tsüngrem tsübuba putu ka yangertettsü sarasadem ayur.