School tekolaktem SLDP certificate course agiogo

Kohima, Luroi/August 29 (TYO): Nagaland nung GHSS aser GHS school tekolaktem atema School Leadership Development Programme (SLDP) dak sendakba nung ita ka atema agiba Certificate course batch 7buba asoshi tatembangbuba sentong tanü SIEMAT Hall, SCERT Kohima nung agiogo.

Iba training ya July 29 nü tenzük aser August 29 nü tembangogo, koba Nagaland Education Project-The Lighthouse (NECTAR) den longjemer ayongzüka agia liasü.

Iba sentong ya school lenirtem tashi itshidaktsütsü aser school tajungba achaayangtsü aser kanga junga len anitsü asoshi tenüngdakba shisatsü aser skill agütsütsü nükjidong nung ayongzüka agiogo.

Training nung shilem agirtemi benokba project work dak sendakba nung report ka Dr. Thebi Joseph Shupao, Research Associate, SCERT, aser Izeule Ramlila, SLA Faculty, SCERT nati metetdaktsü.

Training nung shilem agirtemisa parnok tebilembatem lemsatep aser iba sentong nung angzükba ajanga parnok professional mapa nung terenlok dak kongshiba indang lemsatep.

Sentong ya Additional Director & Cell Head, SIEMAT, SLA, SCERT, Nagaland, T. Lima Longkumer-i o tatsüka jembir tembang, shibai training nung shilem agirtem nem tenüngsang agütsü aser parnok dang parnoki angazükba ya pei school nung takok ngua benoka inyaktsü ajungshia liasü.

Training tembangba sentong ya Benjungdenla Yaden, Reader, SCERT lenisüba nung agi.