National Sports Day nung asayar 151 tushi

Kohima, Luroi/August 29 (TYO): Linük ajunga den jangyu medema Nagaland nunga Hokolbarnü National Sports Day mungogo, aser iba anogo state kübok tesem balala nungi Northeast, national aser International jenjang nung takok tajung angur asayar 151 tushia liasü.

Sentong nung o jembiba mapang Advisor for Youth Resources & Sports, S. Keoshu Yimkhiung  -i, Khelo Bharat Niti 2025 aser Viksit Bharat 2047 den peta Nagaland Sports Policy tasen ka yangludar ta ashi. Paisa, iba policy yagi state nung saisabong jenjang ajungkettsü aser iba yagi asayartem, lokti aser linük tejangraba sayutsü.

Sorkar tenüng nung salem osang lemsatepba mapang Yimkhiung-i tetushi angurtem nem tenüngsang agütsüba den iba anogo ya India nunger nüngtugu hockey asayar Major Dhyan Chand bilemteta amunger, shibai asayartem maneni ajungmesor,ta ashi. Paisa, Chief Minister Neiphiu Rio lenisüba nung state-i districts 17 prongla nung sports infrastructure renloka odar, ta ashi.

Maneni pai Police Department dang asayar tajungtem nem mapa inyaktsü atema maongka agütsütsü mepeshiba den tetushi agütsüba ya senotsü teyari agütsüba dang masü saka “nai merangdangbaji kanga tongtibang, nü nükjidong senti süa agir aser nai takok angubatem benjungtsü,” ta osang ka agütsüba lir, ta ashi.

Kasa mapang nung tetushi tejaoker Nagaland DGP Rupin Sharma-i, state nung asaya balala asayatsü asoshi tejangraba aliba aser tetsükdaktsütem indang lemsatep. Saisabong ajanga taküm yimya azüoker ta shia pai asayartem career kanga tatsü asüba aser Nagaland nung private sponsorship maliba indang jembia liasü.

Maneni paisa, Nagaland Police-i yakta recruitment ayongzüka agitsü aser qualify sütetba asayartem nem tama maongka agütsütsü ta shia asayartem referee, coache aser trainer ama anisemtsü ajungshia liasü. Sharma-i, police force rongsenketzüng nung tetsükdaktsü ajuruba indang lemsatep, saka saisapong ajungkettsü atema maneni teyari agütsütsü nangzüka liasü.

Lenir anapronglai lanurtem dang parnok tashi saisapong nung intoktsü, sportsmanship tanüla ajungkettsü aser Nagaland ya linük nung sporting excellence teyongtsü ka kümdaktsütsü asoshi teyari agütsütsü ajungshia liasü.

Sentong ya YRS Director Kethosituo Sekhose lenisüba njung agi, Commissioner & Secretary YRS Anthony Ngullie-i lokti pela agizükba o jembi aser Additional Director Megolhou Dolie-i tepela o jembia liasü.