State tem dang mozü dak sendakba inyakyim shidak benshitsü tuyur

New Delhi, Mongputeni/October 06 (Agencies): Tawa Madhya Pradesh aser Rajasthan na nung aket mozü ajemba sülen tanur aika asüba dak sendakba nung Hombarnü Union health secretary, Punya Salila Srivastava-i states aser Union Territories ajak dang Good Manufacturing Practices (GMP) atema mozü yangluba units ajak nem Revised Schedule M tasenba shidak benshidaktsütsüla, ta tuyuogo.

Srivastava-i states/UTs ajak nungi tongti health ketdangsertem jaoka senden amen. Iba senden nungji Indian Council for Medical Research tongti aser Drug Controller General of India (DCGI) nung tongti ketdangsertema aden.

Srivastava-i talisa tanurtem nem aket mozü syrups ji telatet dang jemdaktsütsüla, kechiyong aketba teimbaka peisasa anepadoker aser mozü treatment menüngdaker, ta ashi.

Aket mozü ajemba sülen tanur aika asüba dak sendakba nung tamalen Union health minister J P Nadda-ia senden ka ayongzüka liasü. Iba senden nungji Nadda-i ketdangsertem dang states/UTs nungi ketdangsertem jaoka iba atemaji jembitsü tuyua liasü.

Pradhan Mantri-Ayushman Bharat Health Infrastructure Mission (PM-ABHIM) kübok Nagpur nung aliba Metropolitan Surveillance Unit (MSU)-i anogo ishika tejaklen Rajasthan kübok  Chhindwara district nung tanur aika asüba osang metetdakja liasü.

Iba district nung tanurtemi ajemba aket mozü 19 samples bendena tendangogo aser iba nungjagi samples 10 bo ‘quality standards’ kübok liasü. Ajisüaka aket mozü ‘Coldrif’ nungbo Diethylene Glycol aliba jangjaogo. Ibaji ajanga tezüngjang kanga mejungi raksatsür.

“Iba tebushitetba nungji ajemdaker CDSCO-i iba mozü yangluba unit indang license thinentsütsü tuyuogo aser ken o-a benokogo,” ta Health Ministry-i metetdaktsü.

DCGI nungi Dr Rajeev Raghuvanshi-i, mozü yangluba-i unit ajaki Good Manufacturing Practices (GMP) atema Revised Schedule M shidak benshitsüla, ta metetdaktsü.