Bihar nung assembly election Nov 6 aser Nov 11 anogotem nung agitsü

New Delhi, October 06 (Agencies): Hombarnü Election Commission of India (ECI)-i Bihar nung assembly election shilem ana lemsar agitsü, ta sangdongogo.

Bihar nung assembly election ji November 6 aser November 11 anogotem nung agiba sülen November 14 nü vote azüngtsü.

Osangbenertem den jembidang Chief Election Commissioner (CEC) Gyanesh Kumar-i, voters atema election inyakyim ajak tajung asütsü, ta metetdaktsü.

Bihar nung polling stations 1,044 bo tetsürtemi ketdangsütsü, ta pai metetdaktsü.

Paisa, “Social media nung taila osangtem anema inyaktsü aser voters amokmerenba mesüra ozüng alema inyakba mapatem khenyongi magizüktettsü. Election kanga teladak süa timi agitsü. Ibaji ataloktsü atema yimtenren party tem, voters aser osangbenertemi amalitepa inyaktsüla,” ta metetdaktsü.

Election Commission-i Bihar nung electoral roll tasen renemtsü atema Special Intensive Revision (SIR) agiba sülen election agitsü. SIR kübok voters lakh 68.5 tenüng züngdokogo aser voters tasen lakh 21.5 züngokogo.

“SIR agiba sülen final voters list ji yimtenren party ajak nem agütsüogo. Nominations file asüba sülen agütsüba Voters’ list ji final asütsü,” ta Gyanesh Kumar-i ashi.

Paisa, “Polling station ka nung danga voters 1,200 dak tali malitsü,” ta ashi.

Taruba Bihar election nung chief minister Nitish Kumar-i aniba ruling National Democratic Alliance (NDA) teloktep aser Rashtriya Janata Dal (RJD) nungi Tejashwi Yadav-i aniba Mahagathbandhan teloktep na tsüngda atongtepa tokteptsü.

Menden 243 aliba Bihar assembly nung tang BJP MLA 80, JD(U) MLA 45, HAM(S) MLA 4, Independent MLA ana, RJD MLA 77, Congress MLA 19, CPI(ML) MLA 11, CPI(M) MLA ana aser CPI MLA ana lir.