Jaipur nung aliba SMS Hospital nung mi lendong nung nisung 6 asü

Jaipur, October 06 (Agencies): Amongnü aonung Rajasthan yimtiba, Jaipur nung Sawai Man Singh (SMS) Hospital trauma centre nung mi lendong ataloka shiranger trok rongsetogo.

Asürtemji Neuro ICU nung treatment tagidakpurtem liasü.

Trauma centre in-charge, Dr. Anurag Dhakad-i, anasa aliba storage nung mi lendong atalokba mapang nung Neuro ICU nungji shiranger 11 liasü, ta metetdaktsü.

Paisa, “Iba lendong nung tetsür ana aser tebur pezü; ajak senteper nisung trok süogo. ICU balala nung temongdak shiranger 14 bo aniteta kümzük,” ta metetdaktsü.

Mi adokba sülen kobi melii building ajakji moküzü agi asüng aser ibaji ajanga shirangertem aser parnok anepalurtem kanga aoksatepa liasü.

Iba mi lendong nung documents, ICU nung aliba osettem, azü sample bendenba tubes aser medical supplies aika rongdokogo.

Osangbener den jembidang hospital nungji inyaker ward boy kati, “Mi lendong atalokba mapang nungji onok operation theatre nung liasü, anungji onoki shirangertem kümzüktsü atema ilonga centre telung jagi ai. Yangji onoki shiranger pezü nungi asembo kümzükteta liasü. Ajisüaka tesülenbo milak tuluba akümba agi centre telung jagi meitet. Onoki akokba tashi aika kümzüktsü merangogo,” ta metetdaktsü.

Iba sülen police aru, ajisüaka milak tulu den mokozü ajanga parnokia telungi meitet.

Iba osang angashia ayaterm nung Chief Minister Bhajanlal Sharma den Parliamentary Affairs Minister Jogaram Patel aser Minister of State for Home Jawahar Singh Bedham nungeri hospital ji semdanga tensa asadanga liasü.