Banuo Z Jamir nem Classic Award 2015 agütsü

Hokolbarnü de Oriental Grand Kohima nung Nagaland Angh PB Acharya, Classic Award agizüker Banuo Z Jamir, la kinungbo Alemtemshi Jamir, NLA Speaker Chotisuh Sazo aser Classic Club Kohima züngsemtem külemi agiba noksa angur.

Kohima, October 2 (TYO) : Nagaland nung mezüngbuba tetsür Chief Secretary inyaker Banuo Z Jamir nem tanü Classic Award 2015 agütsüogo.
Classic Club Kohima-i 1999 küm iba sempet agütsütsü tenzük. Parnoki saisapong, lokti atema inyakba, shisaluyimba, temang anema alibaren aser meimchir asoshi mapa tajung inyakba kija mesüra telok ajiteta iba sempet agüja arur.
Banuo Z Jamir-i la tematiba menden nung ketdangsüa arudang kanga dang metsüngareta aser bendanga agüja inyakba atema la nem iba sempet agütsür, ta Hokolbarnü de Oriental Grand nung Nagaland Angh P B Acharya-i la nem sempet agütsüdang ashi.
1979 küm Banuo-i Under Secretary, Land Revenue, Government of Nagaland mapa inyaktsü tenzük aser iba sülen tongtipang mapa aika inyakogo.
La ya Naga tsür rongnung mezüngbuba IAS officer lir. Ibaji dang masü Naga tsür rongnung mezüngbuba sub-division nung Additional Deputy Commissioner aser district ana nung Deputy Commissioner inyakbajia la lir. Anosa Village Guards nung mezüngbuba tetsür Commandant General inyakbaji la lir.
September 2014 nung Banuo Nagaland Chief Secretary mapa teinyakdak nung sorkar mapa nungi anisüngzük.
Tanü agiba sentong nung Angh Acharya-i o jembidang, Classic Club Kohima-i mapa tajung aika inyakba atema pelaba ashi aser Banuo nem tenüngsang agütsü.
Banuo-ia sempet agizükdang ashiba agi, la kinungbo Alemtemshi Jamir aser kinüngertemi la teti pusema nungitba aser sarasademtsüba atema pelaba metetdaktsü.