Arogo dak onsara imlar !

Asen lima nung yimsüsürtemi anir nütsüng nübortemi aibelenba ajak asenoki arogo dak atonger aser tai aser meshidak atalokba ajak arogoi shitak küma metongshitsütsü imlar. Ibaji tajungleni bilemdangra, arogo lenirtem dak tashimait aika liaka nübortemi arogoibo temelenshi tajung bener arutsütettsü  ta imlar. Ajisüaka, tanü asen lima kija, kibong, yimten aser loktiliba asoshi tia maka kaji, asenoki arogo dak onsara imlar, anungji asenokibo tamajung ajak inyaktsü aser itemji arogoi tajung kümtsütsü ta imlaba tangatetba aser mulungsentsü ya asütsü. Atangji, asenok shibasa Yisu Khristaji pei taküm nung kibur aser kümtetdakba ta amanga agizüker külen  tzü nung tzüsena arogo telongjem nung züngsemogo, item züngsemtem ajakji arogo nunger, anungji arogo nunger saru nung asenok adener aser arogo nunger nübodok nunga shilem agir. Ajisüaka, asenoki tajung inyaktsü arogo dak imlaba ya asenoksasa asenok arogo nunger züngsem purtem dak imlarba masü saka pastor aser deacon-tem dak imlar ta angateter, kechiyong parnoki arogo nunger ajak tenüng nung tashi amshia inyaker aser Tsüngrem o belenzüka bener arua arogo züngsemtem mesür. Ajisüaka, arogo nung lenirtemjia nisung dang, anungji parnoka pei pei yari tashimait lir. Ashiko, arogo lenirtem karbo arogo züngsem purtem dang nungi tashi maitba alitsüa akok. Anungji, kodang asenoki asenok kibongtem nung tanurtem mazüoktetba  aser taintema meshitak  akümba aser yimten nung  ochimashi inyakbatem ajak arogoi dang melenshitsütettsü ta imladir, aji asenoksasa asenok lendongi aier asütsü. Atangji, arogo lir ser nung arogo nunger mejungi akümba tai aser tebilemtsü nungi arogo lenirtem ajentsü makok, yangji parnoki inyaktsüba shilem tuluka lir. Aji oda, tenla ki sabang ‘pulpit’ yabo arogo lenirtem watang masü saka arogo nung kija, kibong, lokti aser yimten raksaa aliba tesemjiang arogo lenirtemi inyaktsüba watang lir, anungji arogo nung lenirtemi  nisungtem tenla kidangi aru atatsübaji masü saka nübortem bushia oagi parnok taküm aser mapa tajungba küma yanglushitsütsübajiang parnok watang lir ta angatettsüla. Ajisüaka, arogo nung züngsemtemi pei taküm aser kibong yanglushitsübaji arogo nung lenirtemi dang yanglushitettsü ta bilemra, ano ibajiang item taküm aser kibongtem asoshibo tebilemtsü tuluba asütsü. Tangbo asenoki arogo lenirtem indang jembir, saka asen taküm yanglushitsübajibo, aseni memulungra, shingaia makoktsü. Tanü asen lima teraksa aser ochimashi agi sünga lir aser aji yanglushitsü melena tamajungba-tamajungba akümbaji, asenoki asenoksasa yanglushitsü meranger masü saka arogo lenirtem dak imlaba ajanga lir. Aji oda, arogo nung Tsüngrem o rateta ashir mali akümba aser sarasademtsü mejangrai akümba ajakji asenoki arogo lenirtem dak kisüng imlaba agi asenoki meteta aser memeteti atsüngzüka aoer. Tanübo asenok dang Tsüngrem o ashir meliaka asenok ket nung Tsüngrem o lir aser shingaia asenok jangrabangraa tanela nung sarasademtsü menokdanger. Kasaji, arogoi tanela anir aruba mission mapa nung temulung magütsüba agi asenoki tezüdanga nüngsen jembir, ajisüaka arogoi temulung süa meinyakra asenoki asenoksasa tanela anir aruba mission mapaji inyaktsüa shingaia nokdanga mali. Aji oda, arogoi tanela anir aruba mapa inyaktsü agibo kisüjensütsü dang jangraba mapang nung, asenoki mission mapa inyaktsübajia arogoi meinyak tashi arogo daksa imlara, ashiko, asen mapangi asen matatettsüa akok. Atangji, nübortemi arogo dak imlaba jagi arogo lenirtem ajungshir, ajisüaka asen taküm, kibong, lokti aser arogo nung tajung ataloktsüba ajak arogo lenirtemi dang arua ataloktsütsü amai asenoki bilema imlara, ashiko, itemji kodanga mataloktsüa akok. Asenoki arogo dak onsara imlaba agi asenok kisüngia alima nung temelenshi tajung bener arutettsüba mapang aser tashi mamshitet, tesasatsüka, süitemdaktsüdagi. Arogoi inyakra temoa saka joko asenokbo arogo dak talibo meimlatsüla, kechiyong arogoi asenok aküm masü saka asenokiang arogo aküm.