Meghalaya CM Conrad-i Manipur loksaa meyoktsü

Imphal, October 10, 2025 (Agencies): National People’s Party (NPP)-i Manipur nung ketdangsübaren balaka meshiba magizüker ta Meghalaya Chief Minister Conrad Sangma-i ashi.

Manipur nung Conrad-i civil society organizations (CSOs) aser lokti lennirtem den ajurutepa yimjung bener arutsü atema tebilembatem angadangogo.

“Manipur litsü loksaa meyoktsü atema onoki noktaktsü. State sasep nung administrative functions kar tenzüktsübaji takoktsü lir saka Manipur lemdangtsü merangba magizüker” ta pai ashi.

“Nisung ajaki tangatetba tajung nung olemteptsüla aser iba ajanga dang tejakleni aotsü” ta Conrad-isa ashi.

Naga CSOs ajanga pa dang Free Movement Regime (FMR) aser arrtsü atsüdangba indang ashidang Meghalaya CM-i iba atema asüngdangyateptsü nüngdaker ta ashi.

“Centre-i lemtet agiba nung lisopur teloktem dendaktsütsüla. National security ji kanga tongtipang saka sobaliba aser putiotsü akhümtsübutsüla. Olemtep aliba ajanga tejakleni aotsü lenmang lapoker” ta pai ashi.

NPP-I MANIPUR TENSA RAKSATSÜ

Külen, Manipur Congress president Keisham Meghachandra-ibo Meghalaya Chief Minister Conrad Sangma-i anir National People’s Party (NPP) ajanga Manipur tensa raksatsü ta tai tongloktsüogo.

“Conrad-i Manipur semdangba ya NDA tashimait kümer aliba asentenshitsü nükjidong nung lir. NPP-i BJP den tesentaktep tajung lir aser political partner lir. Conrad-i Manipur semdangba ya party tashi itshitsü aser BJP den tesentaktep yanglushitsü atema lir” ta Meghachandra-i ashi.

BJP aser parnok den yaritepertemi Manipur kümzüka meyutet aser nübor nem temeten magütsüteter, ta paisa shisem.

“2017 nungi BJP aser parnok den yariteper NPP ajanga Manipur state raksatsüogo” ta Meghachandra-isa ashi.

“Manipur nung alirtemi BJP-i aniba NDA magizüker kechiyong parnoki ketdangsübaren raksa, ochimashi inyak aser tensa raksatsü atema telemsa adokba policies benoka inyak. Nübortemi Manipur nung democratic tangatetba bener arutsü aser yanglushitsü merangba nung Congress party dena lir” ta Meghachandra-isa metetdaktsü.