Khonoma nung Morung Experience Centre amenokogo

Dimapur, Yimpoksüi/November 29 (TYO): Khonoma nung Morung Experience Centre (MEC) November 29 nü Himalaya (Nagaland) Project nung Forest & Biodiversity Management kübok semzükogo. Iba mapa atema senotsü ya KfW Development Bank ajanga German Development Cooperation-i agüja liasü.

MEC lapokba sentong nung Senior Portfolio Manager, Natural Resources & Climate Asia, KfW Development Bank Dr. Florian Wieneke alakteta jaoker liasü. Iba sentong ya Khonoma nung eco-tourism tashi itshiba, cultural heritage aser biodiversity wazüka ayuba nung alizüng tongtibang ka tongtetba lir.

Sentong nung o jembiba mapang Dr. Florian Wieneke-i, project team, yimtsüng nung alirtem aser state sorkar nem sustainable libaliro ajungketba den külemi biodiversity wazüka ayuba atema tenüngsang agütsü. Paisa, MEC lapokba ajanga 2023 nung küm 25 Community Conservation benjungmung sangdongba sülen küm ana tako nung tembangba sayur ta ashi. Pai, küm 25 dak tema tangar asoshi tatishitsü süa Khonoma yimtsüng nung alirtemi biodiversity wazüka ayuba atema tenüngsang agütsü aser iba ajanga yimtsüng ya Nagaland aser linük ajunga atema model yimtsüng ka akümer ta ashi.

MEC ya lokti meyong lir aser iba project atema Khonoma nung alirtemi ali, rongsen aser nübu agüja shilem 22bo shilem agiogo. Iba centre ya biodiversity education, conservation learning aser eco-tourism atema hub balaka ka asütsü, aser iba ajanga Nagaland, India aser bendanglen nungi tesemdangertem nem Khonoma indang takar sobaliba sayutsü.

Sentong ya Rev. Tsolie Chase, Senior Pastor (BCK)-i sarasademer tenzük aser iba sülen ribbon mejepba sentong agi. CCF & Project Director, FBMP Supongnukshi, IFS lenisüba nung iba sentong agi aser pai MEC project indang metetdaktsü. Sentong nungsa Excise Secretary aser Team Leader, NEPED Kovi Meyase, NCS-i lokti pela agizükba o jembi aser Khonoma Rùffùno Nagaland tir Rokovisa Chase-ia o tatsüka jembia liasü. KNCTS mendenbuba Rokongulie Meyase-i MEC nükla metetdaktsü. Maneni sentong nung Phetsukiku Club, Khonoma-i sobaliba ken ka aten, Peleviso Viyie, Chairman, ETMC-i tepela o jembi aser Rev. Fr. Salas, Parish Priest-i sarasademer tembanga liasü.