Police-i Hornbill benjung security & traffic sentong metetdaktsü

Kohima, Yimpoksüi/November 29 (TYO): 26buba Hornbill benjung December 1 nü tenzüktsü lia iba anogo 10 amungba benjung ya kecha tetsükdaktsü makai mungtettsü atema Nagaland Police-i Honibarnü security aser traffic sentongtem metetdaktsüogo.

Police Headquarters nung osangbenertem den sensaksemba mapang ADGP (Administration) Renchamo P. Kikon-i, three-tier security arrangement ka agiogo ta ashiba den, taoba kümtem ama taküma benjung mapang kecha timtem lendong mataloki takok nung mungtettsü ta temulung lema bilemba lemastep.

Paisa, gari senzüsenpong azükoktsü ya nüburtem atema tebilemtsü tulu ka lir, saka department-i küm ishika gari senzüsenpong kanga junga azüoka aruba ajangshia arudar, ta ashi.

Additional SP (Traffic) Puzoto Khatso-i, gari senzüsenpong aser pass category tem indang osang tejangja agütsü. Garitem pass category tenet küma lemsa lir aser category shia gari balalatem entry point aser anendak balala asütsü.

Z-category (VVIP) garitem Gate-2 ajanga aitsü aser Arena aser World War II Museum anasa anentsü.

X aser Y-category garitem aser PWD garitem Gate-2 anasa gari anenba tesem tongtiba nung anentsü.

Organiser aser artist tem Gate-1 ajanga aitsü aser yokyatsüyartem JCC College aser Legislature Park ajanga atakzükja aliba mapang ka nung dang aitsü.

Gari tulutem benjung amungba tesemi aoba lenmang nung anepdang 7 ako nungi aonung 10 ako tashi senzütsü memelatsü. Old Phesama Check Gate nungi Kisama Heritage Village tashi nung gari anentsü memelatsü aser tetuyuba sülen manidaki anenba garitem bener aotsü.

Kasa mapang nung Kigwema Ground nungi angati shuttle service ka inyaksangshitsü aser NST-i PHQ aser ISBT nungi benjung amungba tesem tashi taah agütsür anir aotsü.

Police-isa, main arena nung prangbong bener sepaitem aitsü memelatsü, saka mejeta shimba protection officer tem iba talenba küboki maittsü. Ajisüaka parnoka miima prangbong tila abentsü memelatsü, ta ashi.

Kikon-i, benjung amungba tesem semdangertem dang Hornbill benjung tekümzükba kübok pelatepa amungtsü atema gari senzüsenpong atema tetuyuba agütsüba sülen tashi anga anidaktsü aser police den teka amteper inyaktsü mepeshia metetdaktsüogo.

Hornbill benjung ya Nagaland sorkari kümshia ayongzüka amungba tourism ajungketba benjung ka lir, kong state kübok kin ajak Naga Heritage Village, Kisama nung longjemdaktsür, koba linük yimtiba nungi km12 shi pilar lir.

Iba benjung ajanga state indang takar sobaliba sayur aser iba den tanga northeastern state tem nungia kin balala longjemdaktsür. Iba den business roundtables balala ajanga shishilembatsü aser sen entoktsü maongkatem sayar.