National Teacher Awardee Peleno Petenilhu nem tetushi agütsü

Dimapur, November 29, 2025 (TYO): John GHSS Viswema nungi National Teacher Awardee 2025 PGT Peleno Petenilhu nem tetushi agütsüba sentong ka Directorate of School Education, Nagaland ajanga ayongzüka agiogo.

Iba sentong ya November 29, 2025 nü Morung Conference Hall, DoSE Kohima nung agi aser ketdangsürtem, school tekolaktem, tesayurtem aser staff aden.

National Teacher Award ya kümshia Ministry of Education, Government of India ajanga agütsür. Linük nung inyakyim tasen bener arua sayuba, bendanga agüja aser kaketshirtem angazükdaktsütsü asoshi inyakba tesayurtem shimteta iba sempet agütsür.

District, State aser National online selection maparen ajanga Peleno Petenilhu ya National Teachers’ Award 2025 atema shima liasü. Lai “Each One – Teach One” inyakyim ajanga kaketshirtem nem tesayuba balala agüja liasü aser iba atema la shimtet.

“Peleno Petenilhu-i linük jenjang nung takok ngua Nagaland nem konang bentsür aruba atema tenüngsang agütsür” ta School Education & SCERT Advisor Dr. Kekhrielhoulie Yhome-i ashi.

Iba takok ajanga Nagaland nung tesayurtemi bendanga agütsüba aser meranga inyakba kuli agütsür ta pai ashi.

“Iba konang ya kijai anguba dang masü saka Nagaland nung tesayurtem ajak ajungmesotsü ka lir” ta Advisor Yhome-isa ashi.