Nagaland nung Kohima Peace Memorial & Eco Park lapokogo

Kohima, November 29, 2025 (TYO): Japan aser Nagaland sorkartemi Kohima Peace Memorial aser Eco Park yangluba tanü lapokogo.

Iba ya bilemtetba, putepshiba aser yimjung atema külem tenangzükba tamaitsü tulu ka lir ta lennirtemi ashi.

“Iba tesem ajanga tesüiba bilemtdaktsür, tanü benjunger aser tarutsü atema tenangzükba agütsür. Iba ya Second World War nung tera yanga lir” ta Chief Minister Neiphiu Rio-i ashi.

“Kohima tiyongtsü nung iba park lapokba ajanga Battle of Kohima nung tasü aitba, bendanga agütsüba aser akanga noktakba bilemtetdaktsür. Second World War nung kanga tesashitiba rara rongnung Battle of Kohima ya ka ta züngshir. Iba rara nung Allied forces aser Naga nungeri timtem jenti ajurua liasü” ta pai ashi.

“Iba rara ya kü mulungjang nung teti lir aser küboia British Indian Army tenzükba bilemteter. Iba rara indang otsütem angazüka ni ain” ta Rio-isa ashi.

Iba Memorial and Eco Park ya Japan-i teyari agüja yanglu aser iba ajanga medemer tajung yimtepba sayur. Japanese kibongtem teti semdangba aser Japanese nungeri yariba mapatongtem inyakba ajanga iba park yanglutetogo. Japan-i yaria inyakba mapatong rongnung JICA-funded 400-bedded hospital aser skill development initiatives lir ta paisa metetdaktsü.

CM Rio-isa kaketshirtem aser sensotem dang memorial semdangtsü aser rara ajanga teraksa bentsür aruba tali metettsü ayongzük.

“Iba memorial nung lapokba dokantem nung Naga products ayoktsüla aser Japanese aser British raraba putiotsü indang items ayutsüla. Japanese nunger dang nungi meranga inyakba aser temulung agütsüba angazükba ajanga loktiliba tajungba yangertettsü” ta paisa ashi.

“Iba mapatong ajanga Japan aser Nagaland tsüngda tesentaktep tajung aliba sayur. Iba tesentaktep ya WWII ajanga yanglu aser tanü yimjung aser kati ka kati meimtepa alitsü osang sangoktsür” ta Environment, Forest & Climate Change Minister CL John-i ashi.

“Iba Peace Memorial ya sepaitem taküm samaba tesem nung yanglu aser JICA-assisted Nagaland Forest Management Project kübok Eco Park lapoker. Iba ajanga tetsürtem self-help groups nem stalls agütsütsü” ta pai ashi.

Iba tesem ajanga sobaliba, putepshiba aser Nagaland biodiversity ajungkettsü ta Minister John-isa ashi.

“Alima rara nung Kohima ya tongtipang tesem ka lir aser iba ya Hiroshima, Pearl Harbor o River Kwai amala otsüsütsü tesemtem den medemdanger” ta Advisor to the Chief Minister and IDAN Chairman Abu Metha-ia ashi.

“WWII ya Battle of Kohima nung kanga dang tongtipang rara ka liasü kechiyong Japanese sepaitem Dimapur tashi arur liasü, aser iba rara ya mali asübo subcontinent putiotsü aser democracy otsü balaka süla” ta Mehta-isa ashi.

Naga nungeri rara nung shilem agitsü memulung saka democratic forces-i takok anguba nung tongti shilem agia liasü ta paisa ashi.

Naga nungeri rara nung tejashi ajanga telongjem aser putepa alitsü tangatetba melenshiogo aser iba ya Peace Memorial and Eco Park ajanga kuli agütsür. sensotemi putiotsü nungi angazüktsüla aser global peace memorials nung “Never again” osang prokshitsüla ta Abu Mehta-isa metetdaktsü.

Iba sentong nung mendenji Principal Chief Conservator of Forests & Head of Forest Force (PCCF & HoFF), Nagaland Vedpal Singh liasü, Pastor Visato Yhoshü-i temoatsü meshia sarasadem aser Chief Secretary Sentiyanger Imchen-i anküp tepela o jembi.