Mapaji asen ayak

Tang tashi nung agia aruba AKM inti mungdangtem nung lenirtemi kanga temulung agüja kaketshir aser lanurtem dang len sayutsü merangbaji mapa inyaker kaka kümdaktsünüba ya lir aser, atangji, nisung shia, tazünger-mazünger ta mali ajak mapa inyaker kaka akümtsüla. Nisung ajaki kasa mapa meinyaktettsü, anungji nisung shiai kechi mapa jangrar aser kechi inyaktettsü ? Aser tangar asoshi kechi nüngdaker (?) ta bilema inyaktsübaji kanga nüngdaker. Aji oda, nisung ka alima nung ali langa alitsübaji pei tsüraburi jatsüba tenüng agi masü mesüra asenok azüngba degree agia masü saka asenoki inyakba mapa agi dang tangari asenok metettsü, anungji aseni inyakba mapaji pei ayak, pei identity, akümer. Aji angatettsü atema, tatishitsü agi, nisung ka tenüng agi Toshiba engineer aküm nung, joko paji Toshiba masü saka Engineer-ba akümer, kasaji Sübongba pastor aküm nung, paji joko Subongba masü saka pastor-ba akümer, ano kasaji Nüngsangbai dokan ka lapok nung paji Nüngsangba masü saka dokan kibur akümer. Ibaji meteta asenoki asenoksasa “ni kechi inyaker ?” ta asüba nung kanga süoki ia bilemtsüla. Tanü asenok tamakok kaji, asenok aika mapa mangu mesüra mapa maka, kecha meinyak kazüteper, anungji asenok tenüngjia tangari memeteti samaa aoer. Aji oda, tangari asenok dang “Na kechi inyaker ?” ta asüngdang dang aseni asen kechi inyakar memetet tamataritsüsa kümra, asenokji alima nung malir amai bilemtsüla, kechiyong alima nungbo mapa ka mesüra kabosa inyaka alitsüla. Tanü asenoki asen taküm aser asen lokti tia ya bilemdangra, asenok tebilemtsü ya , shitakba nungbo, yimten tebilemtsü masü saka asenoki asenoksasa mapa nguteta meinyaktetba tebilemtsü lir, kechiyong asenoki aseni inyaktsüba mapa ya tangar kari asen tonga bener arua agütsütsü amai bilemer. Ibayongji, tazüngertemia azüngtsüba kisungji pei mapa saka zünger mapa inyaktsübajibo tangari agütsütsü amai bilemer, anungji tazüngbo kanga meranga azünger saka zünger kechi inyaktsü ta asüba nung shisabolua mebilemdanger. Iba ama tangatetba mashilen bener alibaji shitaklen kümdakja angatetdaktsütsü asoshi taoba mapang dang masü saka ano tanga AKM inti mungdang nung lanurtem dang mapa inyak sayutsüba nung temulung tali agütsütsü lemteter senshiogo. Atangji, aji kanga nüngdakba mapa ka lir, anungji kanga temulung agüja inyaktsüla. Ajisüaka, Aotsür Aor lanurtem asoshi tekümdangtsü aser tangatettsü kaji, mapa inyaktsüba ya tangari sayu atatsüba mapa ka masü saka peisasa angazüka inyaktsü mulungtettsüla. Aji oda, mapa inyak angazüktsüba ya “training center’ ka nung oa angazüktsübaji dang masü saka peisasa pei alidak angazüktsüba mapa aika lir. Item mapatem rongnung aluyimba mapatem, shiruru metsüba mapatem, chiyongtsü yangluba aser ayokba aser teka mapatem zünger mezüngma lir. Ano, mapa angazükdak tajungtibaji tangar mapa inyakdak par kübok inyaker kümer inyakbajisa tajungba lir. Aji oda, asenoki asen lima nungi tzümartem ajak meindoker asenoki parnnok melena inyaktsüla ta bilemer aser jembir, aji shitak kechiyong asen lima nung asenok mapa maka kazüteper saka parnokbo anogo shia mapa inyakaa sen aar. Ajisüaka, asenoki ajungbenaka parnokji asen lima nungi meindoker parnok melen asenoki parnoki amenba dokanji mementettsü, kechiyong asenoki oset tenüngtemjia memetettsü aser osettemji kong nungi komaka bener aruar ajia mejangjatsü. Aji dang masü saka dokan nung osettsütem koma ayur aser koma ayoker aser teyokzükba senji koma amshir ta asüba inyakyimtemjia memetettsü, anungji asenoki tzümartemi inyaka aliba mapa melenzüka inyaktsübaji, ita sen tila süaka, aji agia asenokji par kübok inyaker kümer par den külemi mapa angazüka küm anasemka inyaktsübaji kanga nüngdaker. Aji oda, asenok tzümar dokan ka nung ‘Sales man aser Sales Girl” akümbaji ita senji masü saka asenok par nungi mapa inyak angazüker amato bilema inyaktsüla. Idangji dang asenoki mapa inyak metettsü aser asenoki parnok melena inyaktettsü aser asen mapa agi tangari asena metettsü.