Assam Rifles-i aluyimertem nem teyari agütsü

Dimapur, Metsüremi/March 21 (TYO): March 21 nü Peren District kübok Jalukie Krishi Vigyan Kendra (KVK) nung Scientist aser aluyimertem senden amenba mapang Assam Rifles-i aluyimertem nem teyari agütsüba den parnok ajungmesoa liasü.

Aluyimba nung bushisüngdang aser tekübokba jenjang nung aluyimba tsüngda tawa aliba süngdaktsütsü nükjidong nung iba sentong ayongzüka agiogo. Sentong nung sepaitemi, tsünüsenpongtsü tali adokdaktsütsü aser aluyimba maneni renloka yoktsü atema local aluyimertem dang tawa tanü benshiba aluyimba technology aser bushisüngdang dak amendaker aliba inyakyimtem benshitsü ajungshia liasü.

Iba sentong ya Krishi Vigyan Kendra Jalukie-i ayongzüka agi, kong temeket yimtsüng nungi aluyimer 80 dak tema, agricultural scientist tem aser ketdangsürtemi shilem agia liasü.

Sensaksem sentong nung metsüjangnatsü tapu balala, organic farming tasatem, integrated pest management, ali health management, tzü wazüka ayutsü aser tsüngsang mongpung dak apet aluyimba amala onük balala benoka sensaksema liasü.

Scientist temi precision farming, bio-fertilizer amshiyim aser tsünüsenpongtsü tali adokdaktsütsü aser rongsen timba aazüktsü asoshi crop diversification dak sendakba nung tawa tanü purapitetba tem indang lemsatep.

Sentong nung aluyimertemi mongintem den sensaksema parnoki tetsükdaktsü ajangshibatem koda bentettsü iba indang asüngdangya liasü, kong anentsü aluba, ozü sangnu agi minprongba aser mongpu balala nung tsünüba tsünüsenpongtsütem junga maruba densema liasü.

Sentong nungsa scientific composting methods, irrigation systems tedangshi aser tawa tanü aluyimdang amshiba hadirtem amshiyim sayua liasü. Maneni sentong nung aluyimertem lokti tentet tenzüktsü nüngdakba aser shishilembadak balala den sendakteptsü koda tongtibang iba indang sensaksemogo.

Assam Rifles personnel temi aluyimertem nem logistic teyari agütsü aser libaliro jenjang ajungkettsü atema scientific aluyimba inyakyimtem agizüktsü ajungshia liasü. Sensaksem ajanga aluyimertem aser aluyimba rijutem tsüngda telongjem adokdaktsüogo aser iba ajanga shisatsü lemsateptsü asoshi sabang ka lapoktsüogo.

Iba inyakyim ajanga northeast nung lokti ajangzükdaktsütsü aser yimdak yimtsüngtem terenlok asoshi Assam Rifles’ bendanga agütsür aliba sayur.