Koridang Bye-election nüngtem nung shisalem sentong ka agi

Aor Kilem nung Koridang Constituency nungi yimsüsür aser lenirtem den mensem agir külen Ao Senden lenirtem aser ABAM lenirtem külemi tangokba noksa.

Mokokchung, Metsüremi/March 21 (TYO): Ao Senden-i ayongzüka Aor Kilem Mokokchung nung tang aruya aliba 28 Koridang Assembly Constituency nung Bye-election agitsüba dak rangloker “Election Merükteta Agitsü Nükla Mensem” ka kaogo.

Tanü iba sentong nung Longkhum, Alichen, Mangmetong, Satsü, Khensa, Yimyu, Meküli, Chungtia, Aliba, Kinunger, Longjongkong nungi yimsürsürtem arua dena liasü.

Tanü iba sentong nung Ao Senden tenüng nung Tir Wb. Marsanen Imsong-i jembidang iba mensem ya Koridang nungeri shimteta lenir MLA Imkong L. Imchen asüba ajanga pa melena lenir shimtettsü asoshi Bye-election agitsü aliba nüngtem nung ayongzükba lir. Iba mensem sentong akaba ajanga election ajanga teraksa masü saka teyanglushiba ka aginüba ajanga ayongba lir ta ashi.

Clean Election ya election inyakyim yanglushitsü asoshi lir saka mapa mekümteter asünung iba melena ya People’s Clean Election ta melentsüla aser ibaji ajanga nüburtem tangatetba melenshir election nung tim masübatem meinyaktsü nüngdaker, election ajanga teraksa bener arur ta jembir, süra temelenshi tajung ka arudaktsütsü asoshi shibai anir inyaktsü, tanü adenshia aliba yimsüsür aser lenirtemi anir inyaktsüla ta Marsanen-isa ayongzüka jembi.

Ao Senden-i temzüng ozüng ka yanglutsü asoshi iba mensem ya jazükba masü saka iba Koridang Bye -election nung temelenshi adoka tajungleni odaktsütsü lemsateptsü jazükba lir ta Ao Senden Tir-isa ashi.

Clean Election-ji Ao kini tenzük anungji tang Koridang Bye-election nungi tenzüka Ao Lima nung pei sasa pei vote agütsü tenzükdi. Tang Bye-election nungi sen alemba, yi alemba, Miim-mozü alemba aser tim masüba inyakbatem anendaktsüdi, Koridang nung tang Bye-election agiba nung temelen adokba ajanga Ao kin temoatsü agidi ta Ao Senden Tir-isa lemsatep.

Sentong nungsa Ao Baptist Arogo Mungdang Executive Secretary Rev.Temsü Jamir-i jembidang election merüka agitsü asoshi Aori Clean Election tenzük saka asenok election mapang nung mesüngjemteter, tangar kinbo asenok dang nungi angazüker kanga jung benshiteter, Ao lima nung election agiba indang jembira o tamajung dang jembitsüsa akümer ta ashi.

Executive Secretary-isa Ao lima nung joko election nung sen aser yi alema, sübokrem amshiba, Vote aliba, vote ayokba, coup asüba ajak ya pongpa pongpa dang agir aser yimya ka ama dang kümogo, Naga lima nung election agiba mapang nung Ao Lima nung dang taküm samar saka tangarbo mesamar, tangar dang kanga dang akseta bilemer ta lemsatep.

Ongpangkong Mungdang Tir Wb. Alemtoshi Imsong-ia tajungshi o jembidang alima raksatsü aser yanglutsü yimsüsür dak tuluka keta lir, anungji tang aruya aliba Bye-election nung ya tajung ka pokteta inyaktettsü asoshi yimsüsürtem tasü aittsüla ta ayongzüka jembi.

Ao lima lima election nung yimer den madenerbo ki shibangtsür aser yim nungi jentoker, iba yabo melenshitsüla kechiaser iba ya asen sobaliba nung mali ta Ongpangkong Mungdang Tir-isa adenshia aliba yimsüsürtem ajungmesoa jembi.

Tanü iba sentong Tsüngremer lenisüba jazüka Yimyu Baptist Arogo Pastor Rev. Puryapang ajanga sarsademer tenzükba den Ao Senden Tatong Tir Wb. Aowati Ozükum ketdangsüba nung sentong agia telok külemi sarasadema sentong tembanga liasü.

Koridang Assembly Constituency nung ya Polling Station ajak agi 30 lir aser Voters ajak agi 22340 lir.