NU-i Poultry Production Technology training ayongzük

Dimapur, Aami/June 05 (TYO): Nagaland nung nüburtemi poultry products tali agiaka tang tashi tangalen nungi bener aruba nung metaloka aliba mechi Nagaland University-i state nung production capacity tashi itshitsü asoshi mera agia Poultry Production Technology nung anogo pongu training agüja liasü.

Iba training ya School of Agricultural Sciences (SAS), Nagaland University, Medziphema Campus indang farmers’ Cell ajanga ayongzük, koba June 1, 2026 nü tenzük aser Hokulbarnü tembang.

Iba training tembangba sentong nung Dr. Mary N. Odyuo, Associate Professor and In-charge of the Farmers’ Cell ajanga jembidang, “Aluyimer, lanurtem aser…

entrepreneurs kumnürtem nem poultry production nung scientific shisatsü aser practical skills agüja pei takum alitsü aser Nagaland nung enterprise tenzüktsü asoshi iba training ya ayongzük,” ta ashi.

Nagaland nung poultry products bushiba tali kumaka, aluyimer aser entrepreneurs temi aiben technical shisatsü, tashidak azüokba yimya, housing & feeding system mabensaba aser modern poultry production technologies mongutetba ajanga aiben timtem ajurur, anungji iba atema training ya ayongzük, ta lai ashi.

Prof. Catherine Rutsa, Head, Department of Livestock Production and Management ajanga lanurtem asoshi talisa livestock aser poultry sectors nung skill development aser capacity-building programme tem ayongzüktsü tongtipang lir ta ashi.

“Iba training ajanga shilem agirtem nem practical shisatsü aser skills agütsüogo, aser training nung adener tem tejangraba tulu nung shilem agia liasü. Shilem agir 12 nungi karbo poultry framing tenzüka lir aser kar iba sector nung tetsüng ajemoktsü aser training nung angazükba shisatsü amshitsü,” ta lai ashi.

Prof. Dipak Sinha, Pro Vice-Chancellor, NU Medziphema Campus ajanga Farmers’ Cell nem iba training ayongzükba asoshi tenüngsang agüja jembidang, “Nagaland nung shi aser shiruru nung ajemdaker yangluba products kanga agir saka tang tashi tangalen nungi bener aruba nung metaloka lir. Iba ama training yagi local production ulushiba aser livestock sector nung pei peria litetba jenjang akangshitsü,” ta ashi.

Tarutsü nung tang tenzüker aser tejenpur asoshi sentong balala yanglur training ayongzükla, ta pai ashi aser entrepreneurs kumner nem credit facilities aser loan schemes agütsüba indang awareness agütsütsü asoshi financial institutions tem den teka amteper inyaknung ajungtsü, ta Prof. Sinha-i ashi.

Iba training nung adener temia tatembang sentong nung parnoki ajangshiba aser angazükba tem lemsatepa liasü.

Anogo pongu Hands-on Training on Poultry Production Technology ya Department of Livestock Production and Management den lungjemer ayongzük, kong state tesem balala nungi nisung 12 arua shilem agia liasü.