Manipur CM-i Loibol Khullen amakertem pua arutsü tuyur

Imphal, June 5, 2026 (Agencies): Hokolbarnep Kangpokpi district nung Kuki nunger asem tepseter aser ki tenet rongdoktsürtem pua arutsü atema Manipur Chief Minister Yumnam Khemchand Singh-i tetuyuba agütsüogo.

Loibol Khullen village amakba aitsür, iba ya taochi melii inyakba ka lir aser magizüker ta Chief Minister Khemchand-i ashi.

Iba tatalokba nung Kuki nunger asem tepset aser ki tenet tashi rongdoktsü.

Teka tazüng aliba civilians amakba ya lapi mapa ka lir aser magizüker. Iba mapa inyakertem pua temerenshi agütsütsü ta CM Khemchand-i ashi.

Paisa state police aser central security agencies dang iba mapa inyakertem aputsü atema mapa tuluba inyaktsü aser lendong ataloktsü akok ta bilemba tesemte nung security akangshitsü tetuyuba agütsüogo.

Khemchand-isa ketdangsürtem dang takoksa ajuruba kibongtem yaritsü metetdaktsüogo.

Chief Minister-isa 4th India Reserve Battalion nung Havildar Kh. Suresh Singh dak kotari agi atsüngba aitsüogo.

Havildar Suresh ya Commando unit, Thoubal nung mapa lemzüka liasü aser June 3, 2026 nü amak.

Thoubal district police-i June 4, 2026 nü iba tatalokba nung tongti süa tai tongloktsür apuba atema tenüngsang agütsür aser tasür kibong den asükhu lemsateper ta CM Khemchand-isa metetdaktsüogo.

NSCN-IM aser parnok proxy group ZUF(K)-i Loibol Khullen village amak ta Kuki Inpi Manipur (KIM)-i tai tongloktsüogo.

Anepdang 4:00 ako meta nungi Loibol Khullen village amaktsü tenzük. Iba lendong nung Letkhongam Haokip, pa kinungtsü Tinmary Haokip aser Jangminlal Haokip nunger tepset ta KIM-i ashi.

Teka tazüng aliba yimdaklirtem tepsetba aser kiojen raksatsüba ya human rights alema inyakba lir. Tasür kibongtem den asükhu lemsateper aser timtem ajurutem den külemi noktaker ta KIM-isa ashi.

KIM-isa India sorkar aser security agencies dang jungjunga bushisüngdang asütsü aser aibelenertem pua temeten agütsütsü takhangba agütsüogo.

Hokolbarnep 4:00 ak meta prangpong amertemi New Keithelmanbi area kübok Loibol Khullen yimtsüng amak ta police-i ashi.

Prangpong amertemi jagi ki kakpoka tua nisungtem mejanga lia injang khaloktsü aser idangji Letkhongam Haokip (34), pa kinungtsü Tinmary Tuboi Haokip (25); aser Jangmental Haokip (30) nunger khaset ta police-isa ashi.

Iba dak alia parnoki kiojen aser gari aika raksatsü. Ki trok-tenet ka nung mi senoktsü aser Gypsy o Mahindra Bolero pick-up truck rongdoktsü.

Iba tatalokba atema bushisüngdang südar ta police-isa shisem.

Maneni, Manipur Deputy Chief Minister Nemcha Kipgen aser Saitu MLA Haokholet Kipgen natia Loibol village amakba aitsüogo.

“Tetsür ka dena tai maketba taküm asem laluba atema temulung raksar aser jashir” ta Deputy Chief Minister Kigpen-i ashi.

Tai maketba civilians dak tenük yoka inyaksangshiba ajak aitsür. Ibala tatalokba ajanga nübortem timtemba tuluba akümer aser yimjung bener arutsü mapa inyakba nung tetsükdaktsü ajurur ta laisa ashi.

Laisa tasür kibongtem den asükhu lemsatep aser sorkari sensotem taküm aser security kümzüka ayutsü atema tenangzükba yur inyaker ta shisem.

MLA Haokholet Kipgen-ia Loibol Khullen village amakba khukhua aitsür ta metetdaktsüogo.  “Tai maketba civilians amakba aser parnok ki raksatsüba ya magizüker aser ajaki khukhua aitsütsüla” ta pai ashi.