Minister Jacob-i sorkar school nung züngdaktsütsü ajungshi

Dimapur, June 5, 2026 (TYO): PHED & Cooperation Minister Jacob Zhimomi-i tsüraburtem dang pei chirnurtem sorkar school nung züngdaktsütsü ayongzükogo.

Aghunaqa Area Niuland nung PM SHRI GMS, Pihekhu nungi PM SHRI Government High School, Pihekhu jenjang nung ajungketba sentong nung Minister Jacob-i iba ya ashi.

“India ya global educational ka akümtsü nükjidong nung tesem balala nung PM SHRI Schools lapoker. Anungji public lennirtem aser department ketdangsürtemi iba maongka agia pei pei tesemtem nung shisaliok rejutem tashi itdaktsütsüla” ta Minister Jacob-i ashi.

Tsüraburtemi pei tanur nem sempet tajungtibaji chichiba shisaliok agütsüba lir. Anungji iba tesem nung GBs aser public lennirtemi pei chirnurtem sorkar school tem nung züngdaktsütsüla kechiyong sorkar school tem nung qualified/trained teachers tajungtiba lir ta paisa ayongzük.

GBs, Public leaders aser School Management Committees (SMCs)-i tesayurtem jilaleni mapa belentsü atema No Objection Certificates (NOC) magütsütsüla ta Jacob-isa shisem.

Sr. SDEO (DEO Charge) Niuland Kitoshi Z Swu-i Minister Jacob aser Education Department dang iba school ajungketba atema pelaba metetdaktsü.

Iba ajanga Aghunaqa Area nung shisaliok bushiba nung maongka aika angutsü aser tesayurtemi maneni bendanga agüja aser tenangzükba agishir kaketshirtem len anitsü ayongzüker ta Kitoshi-isa ashi.