Nagaland nung World Environment Day mungogo

Kohima, June 5, 2026 (TYO): June 5, 2026 nü Kohima Peace Memorial & Eco Park nung World Environment Day 2026 sentong ayongzüka mungogo.

Iba sentong nung Environment, Forests & Climate Change and Village Guards Minister C.L. John-i nübortem dang environmental conservation aser climate action nung shilem tuluba agitsü ayongzük.

Iba sentong ya “Inspired by Nature. For Climate. For Our Future” omen nung ajemdaker agi aser sorkar ketdangsürtem, kaketshirtem aser lipoküm den sendaktepa alirtem aden.

“Nagaland nung arem-min tuluba samaa aobaji alu rongdokdang morok mi adoka rongdokba lir. Arem nung ozü aser arem shiruru alitsüla saka shikariba atema tebilemtsü abener” ta Minister John-i ashi.

Asenok mangko alepba toktsüogo anungji iba mesük shiruru aser ozü tepsetba anentsüla. Kaketshirtem aser lanurtemi awareness campaigns agitsüla aser lipoküm kümzüka ayutsü atema temelenshi bener arurtem asütsü ayongzüker ta pai ashi.

Kohima, Dimapur aser Nagaland kübok tesem balala tatsükba akümba ajanga global warming kuli agütsür anungji asenok külemi iba asoshi mapa inyaktsüla. Sorkari single-use plastics noktanger aser sensotemia environmental pollution ajema kümdaktsütsü merangba nung yariteptsü ayongzüker ta John-isa metetdaktsü.

Nagaland nung plastic bottles, tobacco sachets aser tanga jana mashii endokba atema süoki ia bilemer. Asenok dak civic responsibility alitsüka aser temeket merükmejua ayuba nung yariteptsüla ta paisa shisem.

Minister John-isa senso shia dang süngdong kaka atemtsü ayongzük. Tarutsü pututem asoshi iba ya kanga tongtipang aser tenüngdaktsü lir ta pai ashi.

Pa tanur asüdang süngdong atemba bilemteta jembidang “küm aika tejakdang kaketshirtemi süngdong tema yutsüba tanübo süngdong tululu kümogo. Lanuputu nungi environmental awareness tenzüktsüla aser kaketshirtemi süngdonglidong aser shiruru kümzüka ayutsü nangzüktsüla” ta Minister John-isa metetdaktsü.

“Tsüngremi asenok nem moatsüba raksaa meindokli” ta pai ashi.

Kohima Peace Memorial & Eco Park ya Nagaland sorkar aser Japan International Cooperation Agency (JICA) yaritepa yangluogo aser iba tesentaktep asoshi Chief Minister Dr. Neiphiu Rio dang pelar ta John-i ashi.

Principal Chief Conservator of Forests & Head of Forest Force, Vedpal Singh-ia lipoküm wazüka ayutsü indang nenshi.

Tanü NSSA Park, Nagaland Civil Secretariat nunga World Environment Day 2026 mungogo. Iba sentong ya Eco & Beautification club aser NSSA ajanga ayongzüka agi aser Home Commissioner, Nagaland, Abhijit Sinha, IAS-i tetushi süa jaoker ama shilem agi.

Abhijit Sinha-i lipoküm kümzüka ayutsü aser climate change ajanga temelenshi bentsür aruba indang jembi.

Ali rongsen ajanga terenlok angur saka asenoki talila agiba ajanga lipoküm tayongzükbatem ajurur ta pai ashi.

Sinha-isa lanuputu dang yimyatsüya tajung benshitsü aser anogoshi libaliro nung temelenshi terara bener arutsü ayongzük.

Lanurtemi jana ajemtsü, resources wazüka ayutsü, aser akokba tashi public transport amshitsü ayongzüker ta paisa shisem.