Temeshibo aika meshiogo

Yakanü Shillong nung North Eastern Council 73 buba senden alidang, Nagaland Chief minister-i asenok ajak tenüng nung asenok asoshi Union government dang nüngdak aika meshiogo. Item nüngdaktem rongnung Nagaland asoshi sen talila nüngdakba indang shiogo aser terenlok mapatem inyaktsü asoshia tebilemba aika lemsatepogo. Itemji Union government nungi arurtem, NEC mendenbuba aser kilo kilonser Amit Shah aser DoNER minister Jyotiraditya M Scindia nati komaka anga-ar ashitsü makok, saka Naga nunger nem sen talila agütsütsü aser terenlok mapatem inyaktsütsübaji kanga nangabo magizük-ka asütsüa akok, kechiyong Delhi nungi yokba sen nungi inyakba terenlok mapatem Nagaland nung junga inyakba aser junga renemba otsü ashitsüsa asenok ket nung kecha mali. Ashi, India government-i sen lemzüktsüba ama, asenok ajak nümadangtettsüsa Kohima yimtia shitakba Smart City kümogo, arua reprangdangang ta shia o tenzüktet ka asübo koda jungla. Ibaji dang masü saka Nagaland nung nübortem asoshi kanga rongdaka nüngdakba tenemtsüng lenmang, Foothill Road kanga junga renemogo, anungji aji Trans Nagaland National High kümjang ta ashika asüa, ashiko, Amit Shah o Scindia na pronglai idangjisa züluoka yula. Kasaji, Dimapur-Zubza Railway lenmang kanga junga yangluogo, anungji ano Zubza nungi Kohima tashi train lenmangji tongjang ta ka ashi asüa, ashiko ajia shi-meshika Amit Shah tekong ajak angümzüa agizükla ta bilemer. Aji oda, Nagaland yimti tulutiba Dimapur nungang azük apu, flyover, ana lir, iba jagi train süidang akhidang ama nübortem timtem majurur aser apu anapronglaji tejen süaka kanga junga anepalua amshidagi aser ano Dimapur aser Chümoukdima nung gari tali akümba agi, tanga yimtitem nung ama flyover karbosa yanglusü nüngdak adoker, anungji ajia reprangjang ta shitet nungbo koda jungla ta bilemer. Ajisüaka, tang akaba flyover ana nung ya asenoki tapoka matepteter, state stadium bo yanglupeter ayu aser Town hall tilaka yanglushiba nungbo sen crore 20 shi endok aser ochi obendang angutsüba ki high court ki dang masü saka lenmang dena junga merenemtetba purtem, asenok dak shibaibo temulung alemtsü ? Aji oda, foothill road atema senbo crore 430 ayu saka sen ayubaji amadoker lenmang tenüngjiang melener merenemtet ayuba nübortem asenok ama dak ya NEC nung Northeast state-tem nungi arur tangartemi komaka repranga alitsü ? Aji oda, Assam nungbo Union government senpong nungi yokba dang nungi teimba private company investor-temi raktepa pei sen bener arua parnoka aser Assam nungertema ajangzüktsüsa terenlok mapa tapu balala inyaktsü asoshi sen crore lakh dak tali bener arur. Aji oda, iba amaji Northeast nung investor-temi endoktsü renema aliba senji sen crore lakh pezü dak tema lir. Sen crore lakh pezüji aika, ajisüaka iba nung jagi Nagaland asoshi endoktsü purbo malitsü, kechiyong asenok Naga nungertem ya asüng atema bilema shitakba terenlok mapa inyaktsü bilemertem masü saka ajak ‘Commission Agents’ lir, anungji sen crore lakh-a Nagaland-i aruyonga Commission-ang magütsübutsü. Tanü asangsangba Nagaland-ji aji lir. Ibaji angateta, asenokbo tayimtsü anendak aser yimti tasen tulu akümtsüba indang mejembidang aser Union government dang sen talila nüngdakba indang mashi dang Naga yimten tebilemtsü ya tama koktettsüla. Ajisüaka, Naga yimten tebilemtsü ya akoktsü merangtsü melen, Naga yimten ken o ya nok nü tajung ka ama kümer election takok asoshi dang amshira, asenoki asenoksasa külakoktsüba mapa amato kümadoktsü aser Delhi nung alirtemia asenok mezüngmeshi tenzüktsü. Atangji, tangbo akhi ama Delhi nung yimsüsürtemia asenok ya meima aser akhümtsübua mebilemer amai kümogo, kechiyong asenok nüngdak jembitsü asoshia asen yimsüsürtem nem Delhi nung alirtemi mapanga magütsür. Tetezü asenoki meshiba mulungsua agütsütsü melen tajurua majuruner. Atangji, tajuru shia meshir aser tagütsü shia ochimashir ta asüba nisung shibaibo ajurunütsü aser shibaibo meimtsü ? Atangji,  asenok dak pi temulung alemtsüsa government masü, party-a masü aser nisung-a masü saka asenok jakla aser mulungsentsü teindangba küma melenshitsüla. Idangjibo pi asen nem aseni memeshiba dena agütsütsü.