Aremzüktsüba mapang

Dimapur nung asen nisungi asen kidang alir tangar tetsür chanu dak meinyaktsü inyakba maksü ken o agi tang ya asenok ajak menena lir. Atangji, ano tang tashibo obendangdak nungi obendangbo magütsü, anungji tanutsüla jagi tai tonglokja alirtem aija aliba ken o ji kong komaka tembangtsütsüar ashitsü makok. Ajisüaka, tang yongi tepuokdak puoka alirtemji dang masü saka Aor ta asübabo ajak shi azü mazüoki tetsür tanur dak tim masüba maksü mapa inyakertem amato dang kümja tilutsüba aser maksütsüba o tamajung aika belenshiba angur. Atangji, pei kin aser pei nisungi mena nungji asenoka meshimeshiabo mejenbur saka nisung kari majung inyakbaji kini inyakba ama küma mezüngmeshira, ibajibo tim masü, iba jagi kasa kinunger aser kasa kin nisungsa süaka tai maketertembo temulung yirur. Aji oda, tang ya tangar kintemi Aor ajak majung kümja jembiba agi asenok aika mulung yirua alitsüa akok, ajisüaka ibai aremzüktsüba mapang lir, kechiyong aremzüktsüba tashi aser tangatetba ya tang amai asen  dakbo tai maket ser nung kettsütsü meranga aitsüba aser jashidaktsüba mapang amshitsü nüngdaker. Aji oda, tai maket ser nung kettsütsü merangertemji tangatet aser tabensa nisung masü, anungji kodang asenoki parnok denji kasasa toktepa par tai bushitsü merangdir, asenokang parnok mabensaba aser mangatetba jenjang jagi alur asütsü. Anungji, asenoki memenaaka, asen adianu kati tai menaba ajanga asenok kangshi dang asenoki aremzüka atatsübaji tangateter kin aser tangateter mapa asütsü. Aji oda, tangari asenok sanga jembidang mesüra asen asoshi tajung inyakdangbo taremzük shisatsü aser taremzük tashiji amshidak makatsü, anungji asenok dak taremzük shisatsü aser tashi tilaka danga lira, aji tang ama mapang nung amshitsü tapet asütsü. Tangbo tia majung, tamajung atalokba indang jembir, saka tajung ka atalok asübo iba nüngsangjia asenok ajak meyong süla. Itemji kodang bilemdanga, alima nung nübortem dak atalokba indang shisadangdir, atangji, pei nübortem rongnung kari kin ajak mak asütsüsa tamajung inyakbaji odangbo masü, ashiko, par kin jagi Tsüngrem jashitsüsa inyaka alitsüa akok. Kasaji, pei nübortem rongnung kari kin ajak nümadangtettsüsa takok tajung bener arutsüra, ashiko, ajia par kini Tsüngrem pelatsüsa inyakba agi asütsüa akok. Aji oda, kin ka mak asütsüsa atalok dang, tangari kechikomaka mezüngmeshidir mezüngmeshiang, ola madoki pei nübortemi temulungjang nung Tsüngrem dang tadok meshiba mapang agitsüla. Kasaji, tajung atalokdang kini Tsüngrem tenüng asangtsüla. Asenok menen ya Tsüngrem temeim dak alaka kecha agia menembangtettsüsa tulu lir, ibayongji asenok alima tsüngdang nümamedangteti akseta lir. Aji oda, asenoki asen menen ya Tsüngrem temeim agi masü saka asenoksasa nembangtsü merangra, asenoki menembangtet tuluba dang jungkai adoka aotsü. Ibai asenok asoshi Tsüngrem tsüngdang tai temenen nangzükba mapang aser nisungtem dang aremzükba mapang asütsüla. Ashiko, tepuokdak alirtemi inyakba maksü mapa ajanga asen kin aser asen nübortem alima tsüngdang tejak metentettsüsa akümba ama, asenoki asen yimten, asen lokti, asen arogo aser asen mungdang lenisüba mapatem nung ochishia meinyatet aser melitetba ajanga asenok maksüdaktsütsü asoshi tia makartemji amshi asütsüa akok, kechiyong Laishiba nung Apijemtsü Shin 16:4 nung ashir, “ Tamajung purtemji tamajung anogo asoshi yanglu.” Ibaji shitak süra, kechiba tamajung anogo asoshi yangluba tamajung purtemi inyakba mapa tamajung ajanga asenok tamajungba küma menendaktsütsü ? Aji oda, parnoki inyakbaji asenoki inyakba ama bilema asenok ya tang anakmezüa Tsüngrem aser nisung tsüngdang tadok meshitsüba mapang lir. Asenok jungra, asenok rongnungi tajung adoktsü aser asenok mejungra asenok rongnungi tamajung adoktsü. Aji oda, asenok majung yur, asenokbo kechiba asenok dak nungi tajung adoktsü imlatsü ? Asen tsüraburtem tajung asüba agi asenok tajung asü südi, saka tanübo asenok majungba agi asenok chirnurtema majunger asütsü. Ibaji asenoki angatetra, asenok dang taremzük asüyonga aremzüktettsü aser tadok temeshi asüyonga meshitsü.