Manipur nung Naga nunger trok tepsetba telok balalai aitsür

Dimapur, Aami/June 11 (TYO): Manipur nung tai maket Naga nunger nisung trok tepsetba asoshi mangyim tejashi lemsateper, ta Naga People’s Front (NPF) sangdong ka ajanga ashi. Parnok ya prangbong bena alirtemi May 13, 2026 nung tashiyim amshia pua bener ao.

Onoki iba tazü mapa tesashitiba jenjang nung aitsür. ‘Armed gang’ ajanga tashiyim amshia tai maket Naga nunger pua bener aoba aser tepsetba ya meimchir temeden nung aibelenba kisüng masü saka civilized society ajunga tangatetba anema inyakba lir, ta sangdong ajanga ashi.

Naga nunger yimjung, ochi aser akhum bushiba nung mapang talangka timtema aruogo. Asen nüburtemi akangjungshitep aser ken o ajunga nung yimjung pangzüng aginüa aliba mapang ka nung iba ama shisa maka azüdokshi ya kangasa tai aser region nung tashi mait yimjung amokmerener, ta NPF-i ashi.

Item tai maket nisung trok takum samaba ya Naga nunger ajunga asoshi takoksa lir. Onok mulungjang aser sarasadem nung parnok kibongtem bilemteter aser NPF-i asükhu lemsateper. Onoki Government of India aser Government of Manipur dang tekeraba nung bushisüngdanga ochi obendang agütsütsü ajungshir.

Iba tazü mapa tamajung inyaker jangjateta ozüng agi melaba ama temerenshi agütsütsü asoshi indang-indanga aser ochishia bushisüngdang asütsüla. Kasa mapang nübur ajunga dang süngjema alitsü aser tensa tamajungba akumtsüsa tayang kepzüktepba mapa meinyaktsü ayongzüker.

Azüdokshi ajanga asen tebilemtsü kodanga mokoktettsü, aser stakeholders aser CSOs ajunga dang Naga nunger ajunga kumzüka ayutsü ayongzüker, ta ashi. Kasa mapang June 10, 2026 aonung menur Senapati nung NPF Manipur State Unit office raksatsüba asoshi jashiba lemsateper aser khukhua aitsür, ta parnoki ashi.

Onoki ozüng amshiba agencies tem dang iba ya tekeratiba nung bentettsü aser kanga junga bushisüngdanga tekeratiba nung temerenshi agütsütsü akhanger, ta NPF-isa ashi. Kuli kiralongrar gangs tem aser par frontal Kuli Village Volunteers temi shiruru mulungsentsü dener nisung tepsetba khukhua aitsür, ta NSCN/GPRN sangdong ka ajanga ashi.

Item tazü aser tashiyim mapa ya meimchir anema tapi agi mapa tamajung inyakba lir, shirnok tangatetba aliba lima nung talidak mali. Rara mapanga asür nem akhum agütsüba yimya ajaki amshir. Nisung temang asaa raksatsüba ya tetsübo adokdaktsüba dak alaka kecha maka aser mangyimer kibongtem aser nüburtem mulungjang nung tetsübo aitdaktsür, ta ashi.

Alimai ngua iba ama tepsetba aser reshikangshia amshiba atema item telok ya tekeratiba nung ozüng alema inyaker aser kiralongrar telok ta sangdongtsü Government of India dang akhanger. Asaa civilian tem dak tenük yokba, nüburtem tsübuokdaktsütsü asoshi azüdokshiba aser tasümang nem akhum magütsüba ya kiralongra mapa inyakba tejangja lir.

Iba ama mapa inyakba telok tem ‘political legitimacy’ ajunga agientsütsüla. Item telok mazüoktetera ano tarutsü nung tashiyim mapa inyaktsü temulung ang tali ulushitsü, ta NSCN/GPRN sangdong ajanga ashi.

Tetsür temi democratic temeden amshia longkak aitba atema süjen agi yangluba kazütsü ama amshia, kaketshirtem merenshia, ozü village guards tem tashiyim amshia nokdangba Indian security forces ajanga Kuki kiralongrar telok tem nungi ozü nüburtem kumzüka meyuteter, ta ashi.

Onoki mangyimer kibongtem den asükhu lemsateper aser iba mapa tamajung agi kongshia alir ajunga den onok nokdaka lir. Item tazü mapa inyaker nem obendang magütsü tashi onoki ajem ajema malitsü, ta NSCN/GPRN sangdong ajangasa ashi.