India, Assam aser Nagaland tsüngta MoU zülutepogo

Dimapur, Aami/June 11 (TYO): Assam-Nagaland arütsülen totzü aser natural gas bushitsü aser yanglutsü atema küm aika mangatettep arur, Brehostibarnü New Delhi nung India, Assam aser Nagaland sorkartem tsüngta Memorandum of Understanding (MoU) ka zülutepogo.

Iba tezüngzüktep ya Union Home Minister Amit Shah, Union Minister for Petroleum and Natural Gas Hardeep Singh Puri, Nagaland Chief Minister Neiphiu Rio, Assam Chief Minister Himanta Biswa Sarma aser Union sorkar nungi ketdangsür aser state ana sorkari nungi teshimtet nübu tem lia zülutepa liasü.

Iba zülutepba ya otsüsütsü mapang ka lir, koba ajanga region nung totzü aser natural gas bushiba ulushitsü aser Northeast ajunga nung ali rongsen bushiba nung maongka lapoktsü, ta Amit Shah-i ashi. “Northeast yimchiyimjung aser terenlok alitsü ato kilonser mangdang asangsang akumba nung tenü asenoki takok ngua tetsükdaktsü tuluka agienogo aser iba agreement yagi ‘Nation First’ tanüla sayur,” ta pai ashi. Disputed areas nung rongsen 50:50 lemsatsü Assam aser Nagaland nati mulungtepogo, ta pai ashi.

Northeast nung mapang talangka nung anendaka aliba ken o ka tatem katyi aruogo, ta Shah-i ashi. “Iba agreement nung takoker-a mali mesüra tamakoker-a mali. Ibai India, Assam aser Nagaland asoshi takok anguba alitsü.” Iba MoU yagi Northeast nung ali rongsen bushia agitetba inyakyim asoshi lenmang lapoktsütsü, kong totzü, natural gas aser ali rongsen jenti lir, koba mangatettep aser law and order tebilemtsü mechi peria mamshi aru, ta Union Home Ministeri ashi.

Mangatettep aliba tesem trok alema oa totzü bushiba nung yaritsü Nagaland-i mulunga aliba asoshia pai pela agizüka liasü. Iba agreement yagi tang anogo ka nung totzü barrels 1,000-1,500 yanglua aliba nungi ter ben agi timba yanglutettsü aser oilfield ka nungi sen 15,000 crore dak tema ajangzüktsü ta ashi.  “Nagaland nung aliba totzü aser gas reserves ya ajunga amshira, India-i nüngdakba peritsü asoshi bendanger dak metaloka aliba kanga ajemtsü,” ta Shah-i ashi.

Bharat indang energy security ulushiba nung mera tuluka Ato Kilonser Narendra Modi lenisüba kübok agiogo, ta ashi. Modi ato kilonser akumba sülen Northeast nung Centre-i yimjung alitsü asoshi meranga inyaksangshiba indang jembidang, 2019 nungi region nung peace agreements 12 jungnüa zülutepogo aser ibaji ajanga azüdokshi shilem 80 shi ajemer, aser terenlok akar, ta pai ashi. Tanem tanemi Armed Forces (Special Powers) Act (AFSPA) agienba indang jembidang, tang Northeast shilem 80 dak tema iba Act nungi salaogo aser taruba küm tashinung anünga aliba tesem timba nungi agientsü imlar, ta Union Home Minister Amit Shah-i ashi.

Alima nung mepetmesü aliba ajanga bendang lima nungi totzü bener aruba nung metaloka aliba ajemtsü jangjar, aser iba tezüngzüktep yagi khu tuluka abentsü. Nagaland Chief Minister Neiphiu Rio den Deputy Chief Ministers TR Zeliang aser Yanthungo Patton nungeri Nagaland nung petroleum bushia agitettsü indang jembishinütsü atema New Delhi nung Union Petroleum and Natural Gas Minister Hardeep Singh Puri ajurur anogo ka lir iba MoU ya züluteper.

Iba tezüngzüktep ya ajanga mangatettep aliba tesem nung hydrocarbon bushiba mapa tenzükshitsü aser ulushitsü imlar aser kasa mapang Centre aser Assam aser Nagaland sorkar tem tsüngta teka amteper inyaktsü atema framework agütsütsü.