Arogo dang Mungdang tuluba masü

– T. Yapang Lkr, Kohima.

Khrista dak amangba lokti aika liaka asen Nagalima nungbo Catholic, Pentecost, Revival aser Baptist ya asenoki jangja meteta alibatem asütsü, koba teloka süang Arogo ya Laishibai melaba tentet ka, saka Baptist purtem asoshibo item arogotem telungjem ka tenteta iba telokji arogo dang tuluba kümer tashi amshitsüji Laishiba tesayuba nung mangur, Arogo kaji Mungdang ka kübok kechisüdir süaka adentsüla (affiliated asütsüla) ta bilemra itemji  Khrista dak amangba nungi talangka pilaba tamaitsüji aji asütsü, arogoji Khrista dak ang sentaka lungjema alitsüla. Mungdang ka tenzüka yangji lungjema aliyonga tajungba dang, saka aji Arogo madak tashi amshitsüba masü, ajimesüra iba Mungdangji toktsü tajungba asütsü. Ano Mungdang nung tenzükerji Arogo nung tenzüker den kasa masü, pa/laji mulungtet telok NGO ka nung tenzüker dang ashi aji Arogo madak kibur masü. Ajisüaka yamala NGO nung inyakertemji joko inyakeri dena aibelena bilemba aser netsüng nüburtemi dena NGO ka nung inyaker sürnung Arogo madak tuluba oda Sannüker dang tuluba ama tanela jenjang nung bilemba ajurudangogo, ano pei sasa peiji temeshitiba taküm aser Tsüngrem melena inyaker ama bilemba ajurudangogo. Shidi sürbo yim tilatiba Arogo ka nung sannükerji Mungdang nung ES/GS dang nungi tuluba. Kari Mungdang nung inyakerji Arogo tilaka nung Sannüker dang tuluba ama bilemra pa/laji joko Laishiba tesayuba nungi pilaba tamaitsüji aji asütsü.

Iba amala inyakyim aika ajangshia arudaki, asenoki metettsü asoshi ni aika ajangshiogo item rongnungi tila ka shinür, 2023 küm ni asen Nagalima Baptist Mungdang ka nung General Secretary ajurutsü asoshi office jaki ao, aiben odangaka majurutet, oda MLA Minister ka den ajurutsüba ang temelaba. Aiben odanger kenüji GS office anasa Office Assistant mena liasü, anungji ni pa dang “GS ajurunüa aru” ta ashi, pai “Na kechi nüngdak atema?” ta asüngdang nung, “Pai kaket nung tai kuli zülua lir, aji melenshiang ajimesüra okadaki anir aotsü ta ashitsü atema ni aru” ta ni ashi, pai ni khenpika bangka repranger “Mungdang ka nung GS kati zülubaji joko aji Yisu melen, aji tatem” ta ashi, anungji ni “ibaji Laishiba koba tapu nung yamaji asütsüsa shia lir? Nüngdak süra GS-ji office nungia atsüzüka yutsütsü” ta ni ashi, pa niji kanga süngmanga repranger “Tanübo meeting lir anungji asüng call südanger arung” ta pa opung züngya agütsü, tananü ni call südanga jembir 12 shi nung arung ta ashi, jembiba ama 12 shi nung office atong, saka Office Assistant jaki “11 nung arung ta ashi nung nai menur aru anungji majurutettsü” ta ashi, ni küna jembiba mangaoka (record) yua aliba angadaktsü, paji tera nema medangteti GS denji ajurutsü mela, ni GS office telungi ai nung paibo kanga pela jembi. Yamaji Tsüngrem tenzükerji Kotak nung tua mena ali ama tamanger aikadi bilemdar, aji temenen tanülai apurtem.

Ibanü GS denji jembiyonga or pai ashi “Ni iba kin Mungdang dangi shiti ka jangjanüa yok nung ajia melangzüteteter, iba amala Mungdang nung ketdangpur jaki kin ka koda tanela nung tejakleni anitsü?” ta jashiseta shia liasü, ni pa dang “Parnok temenen tanülai puogo, saka na ne menen nungi pungteta tuguang, kecha telok, kecha kin mesüra koyimbaia na mekümzüktettsü, anungji na ne sasa ne aibelen metongshiang” ta dang shir yutsü, pai tashi anga melenshi nungji ajak asoshi tajung aser asen Tsüngrem tenüng asanger.

Tekalen shia aliba ama Mungdang ya Arogo masü, aser Arogo ya dang Laishibai melaba tanelar ketdangsür telokji lir, telungjem telok kwi tenzüknür tenzükang aji tajungba dang, saka ajibo Mulungtet telok ka dang, oda aseni ashitsü agi NGO ka dang.