National Conference-i Jantar Mantar nung longkak aittsü: Omar Abdullah

Srinagar, July 10 (Agencies): Hokolbarnü Jammu & Kashmir Chief Minister, Omar Abdullah-i, National Conference (NC) party-i Jantar Mantar, Delhi nung longkak aittsü atema temelaba meshir, ajisüaka nisung kari iba sentong nokdangtsü meranger, ta ashi.

NC-i July 20 nü tzüngluruwa mongpu Parliament senden tetenzük anogo nung Jantar Mantar nung mener longkak aita Jammu & Kashmir nem tanaben state jenjang agüjang, ta Centre sorkar nem takhangba agütsütsü, ta metetdaktsüogo.

NC-isa yimtenren party balala aser linük tesem balala nung yimsü lenirtem 52 dang longkak aitbaji pusemtsü mepishiogo.

Srinagar nung osangbenertem den jembidang Chief Minister Omar Abdullah-i, Jantar Mantar nung longkak aittsü atema tang tashi nungbo temelaba mangu, ta ashi.

“July 20 nü sentong ka agitsü. Onoki temelaba ngura sentong ka agitsü,” ta pai ashi.

Jantar Mantar nung longkak aittsü atema Cockroach Janta Party (CJP) nem temelaba agütsüba dak sendakba nung chief minister-i, Jantar Mantar nung longkak aittsü atema CJP nembo ghonda 24 tsüngda temelaba agüja liasü, ajisüaka temelaba angutsü atema National Conference-ibo tesüiba anogo 4-5 atar, ta ashi.

Abdullah-isa, “Nisung kari NC sentong nokdangtsü meranger. Onoki anogo 4-5 meranga arudar, ajisüaka kari onok sentong nokdangtsü meranger. Parnoki parnok anogo melenshia onoki shimba anogo ang shimogo,” ta ashi.

National Conference-i jaokba lenir 52 rongnung Congress lenirtem- Sonia Gandhi, Mallikarjun Kharge aser Rahul Gandhi nunger, DMK tongti M K Stalin, TMC tongti Mamata Banerjee, Samajwadi Party tongti Akhilesh Yadav, BSP tongti Mayawati, RJD tongti Lalu Prasad Yadav, NCP tongti Sharad Pawar, UBT tongti Uddhav Thackeray, AAP tongti Arvind Kejriwal, YSR Congress tongti Y S Jagan Mohan Reddy, BRS tongti K Chandrashekar Rao, AIMIM tongti Asaduddin Owaisi aser SAD tongti Sukhbir Singh Badal nunger densema lir.

NC-isa Tamil Nadu chief minister aser Tamilaga Vettri Kazhagam tongti, C Joseph Vijay, CPI tongti D Raja, Rajya Sabha MP Kapil Sibal, taoba mapang J&K chief minister Ghulam Nabi Azad, PDP tongti, Mehbooba Mufti, BJP J-K Tir Sat Paul Sharma, Apni Party tongti Altaf Bukhari, Peoples Conference tongti Sajjad Lone, JKPCC tongti Tariq Hameed Karra, CPI(M) lenir M Y Tarigami aser MP Engineer Rashid nungera jaokogo.