2029 küm nungbo ‘One Nation, One Election’ renema alitsüa akok

New Delhi, July 10 (Agencies): 2029 küm Lok Sabha elections nungbo ‘One Nation, One Election’ mapa küma benoktsü atema Joint Committee of Parliament-i inyakdar, aser 2029 küm tashi nungbo iba ya renema alitsüa akok, ta Hokolbarnü Committee nung mendenbuba, PP Chaudhary-i metetdaktsü.

Goa nung anogo ananü committee senden amenba sülen osangbenertem den jembidang Chaudhary-i, ‘One Nation, One Election’ atema linük tesem ajaklen lokti tentet balala nung lenirtem den jembishinüdar, aser tang tashi nung aikati iba ya pusemdar, ta ashi.

Paisa, mapang balala nung election aiben agiba ajanga India nunger senpong nungi sen 7 lakh crore shi takoksa angur, ta metetdaktsü.

Committee-i Goa nung ayongzükba senden tenzüka Constitution (129th Amendment) Bill, 2024 atema jembi aser Goa chief minister Pramod Sawant aser state cabinet züngsemtem den-a shisa lemsatepogo.

Chaudhary-i, “Onoki Goa nunger ajak tenüng nung chief minister aser cabinet minister tem den shisa lemsatepogo. Onoki ‘One Nation, One Election’ atema jembiba den külemi iba dak sendakba tayongzükba balala atema jembi,” ta metetdaktsü.

Paisa, committee-i Gujarat, Karnataka, Maharashtra, Himachal Pradesh, Uttarakhand, Punjab, Haryana aser Delhi densema state aika semdanga linük temzüng tsütsü mongintem, shisashirtem, lokti tentet balala nungi lenirtem aser stakeholders ajurua jembiogo, ta ashi.

“Lokti tentet balala aser organisations shilem 99-i election khenyongi dang agitsü pusemba lemsatepogo. Onoki maneni yimtenren party ajaki agizüktettsüsa inyakyim benoktsü atema inyaktsü,’ ta paisa metetdaktsü.

Taoba mapang linük Tir Ram Nath Kovind nem agütsüba report ajanga ashiba agi, linük tesem balala nung election mapang balala nung agiba ajanga sen 7 lakh crore shi takoksa anguba bushitetogo, anungji khen nungi dang election agiba ajanga rongsenkettzüng tsütsü senotsü aika kümzüktsü, ta pai ashi.

Chaudhary-i, One Nation, One Election ajanga 2047 küm tashi nungbo ‘Terenlok India’ alizüng tongtetba nung shilem tulu agitsü, ta ashi.