Küm 40 tsüngda tang mezüng India PM kati New Zealand semdanger

Melbourne, July 10, 2026: Ato kilonser, Narendra Modi-i Australia semdangba sülen Auckland, New Zealand-i apusoa aotsü lia Melbourne Airport nung tangokba noksa nung angur.

New Delhi, Chiteni/July 10 (Agencies): Hokolbarnü Ato kilonser Narendra Modi New Zealand tonga ogo; tesüiba küm 40 tsüngda tang mezüng India nunger Ato kilonser kati iba linük semdanger, ta ketdangsertemi metetdaktsü.

Modi Auckland nung aliba airport tonga aoba mapang nung New Zealand Ato kilonser, Christopher Luxon den ketdangsertemi pa agizük.

Modi tayimtsü nungi ayazüka aluba sülen Luxon den salem aser azütep.

Ato kilonser Luxon-i jaokba nung ajemdaker Modi-i anogo ananü iba linük semdanger. Iba mapang nung tenati linük ana tesendaktep tajungba akümtsü atema jembitsü.

Yaküm March ita nung Luxon-ia India semdanga liasü. Linük ana tsüngda India-New Zealand Free Trade Agreement agiba sülen mapang tatsüka tsüngda pai India semdang.

Modi aser Luxon nati lenla aika nung tesendaktep tajungba akümtsü atema jembitsü; talisa rongsenkettsüng, shishilembaba aser commercial sectors nung taliba amalitepa inyaktsü atema jembitsü, ta ketdangsertemi metetdaktsü.

Modi-isa New Zealand nung business lenirtem aser saisapongertema ajurutsü aser India nungertema ajurua jembitsü.

Ministry of External Affairs (MEA)-i, lenir anati tesüiba küm ana tsüngda linük ana tsüngda tesendaktep reprangshitsü, ta metetdaktsü.

Modi-i Indonesia aser Australia na semdangba sülen tang New Zealand semdanger. Iba ya India nunger Act East Policy den sendaktepa lir.