Chümoukedima DPDB senden nung LADP proposals agizük

Dimapur, Chiteni/July 10 (TYO): Ita shia amenba District Planning & Development Board (DPDB), Chümoukedima senden July 10, 2026 nü Deputy Commissioner, Chümoukedima indang Conference Hall nung Advisor, Urban Development and Municipal Affairs & Chairman, DPDB Chümoukedima, Zhaleo Rio lenisüba kübok mena liasü. Iba senden nung Advisor, Industries and Commerce, Hekani Jakhalu aden.

Advisor Zhaleo Rio-i senden nung züngsemtem den jembidang, Chümoukedima district nung sorkar indang offices tali amenokyonga arur asünung ketdangsür temi pei mapa nung nendaka inyaktsüla, ta ashi.

Pai ketdangsür ajunga dang tenüng agi masü saka nükjidong yur bendanga agütsür nübur tenzüktsü ayongzüka liasü.

Advisor Hekani-i jembidang, DPDB senden amen shia “Team Chümoukedima” koba inyaker aser koba tashi tejakleni aor ta lepa reprangtsü maongka angur, ta ashi.

State nung senotsü peria maliba tebilemtsü liaka aser revenue generation nung tayongzükba balala liaka local economy tashi itshitsü asoshi jangja-jangja inyaktsü nüngdaker, ta lai ashi.

Board-i society registration atema applications agüja aliba asadanga jembi aser Pro Village, Molvom Village aser Odia Samaj Nagaland, 4th Mile, Diphupar ya registration atema temaba ketdangsür dangi yoktsü lemtet.

Board-i 2026-2027 atema Local Area Development Programme (LADP) proposals asadanga jembir agizüka liasü.

Chümoukedima nung District Industries Centre (DIC) amenoktsü onük süoka jembi aser iba maparen Sorkar sasep nung asadangba mapang lir ta metetdaktsü. Parnoki sorkar inyakyim shidak inyaka iba centre amenoktsü ta jembia liasü.

Senden nung Chümoukedima Saturday Bazaar nung suspension bridge yanglushitsü aser kasa tesem nung foot overbridge yanglutsü atema Chakhroma Public Organisation (CPO) ajanga tezüluba nung agüja aliba jembia liasü.

Parnoki iba onük ya State PWD dangi abentsü lemtet aser kasa teyanglushiba mapa atema District Disaster Management Authority (DDMA) ajanga se 4 lakh agüja lir ta metetdaktsü.

Additional Deputy Commissioner T. Lemlila Sangtam, NCS ajanga tang teinyakdak Census exercise indang osang tongmelang agi lemsatepdang, tang tashinung shilem 25 shi ayimjemogo ta metetdaktsü.

Iba exercise ketdangsütsü atema district nung Charge Officers pongu lir aser district nung iba exercise mapang shidak nung tembangtsü imlar, ta lai ashi.

Iba senden nung Yanathung Kithan, Scientist ‘B’, Nagaland Pollution Control Board (NPCB) ajanga Solid Waste Management indang PowerPoint presentation ka agütsüdang, scientific yimya amshia jana bensatsü, bendentsü aser indoktsü nüngdakba indang lemsatepa liasü.

Solid waste management dak sendakba nung Advisor Rio-i nübur ajungai Solid Waste Management Rules sülen anidaka temelenshi arudaktsür akumtsüla, ta ashi.

Pai district administration, Chümoukedima Town Council aser nüburtem teka amteper inyaktsü ayongzüka liasü.

Maneni taruba DPDB senden nung Urban Development Department ajanga PowerPoint presentation agütsütsü lemteter senden tembang.