FIFA World Cup 2026 mechi Bangladesh nung nisung 12 süogo

Dhaka, Chiteni/July 10 (Agencies): Bangladesh ya FIFA World Cup kata nunga asayadanga mali, ajisüaka küm pezü shia iba linük nung nüburtemi süoshi sentsü tenenya aser tamak mesüra tanen aser temesüng asemer agi asünger.

Football yagi küm aika Bangladesh aser kidanger West Bengal nung nisung million aika tzüratemdakja arur. Arütsü anatsülen iba saisapong repranger jenti lir, ajisüaka Bangladesh nung football jangraba yabo khenyongi balaka lir.

Iba linük ya FIFA World Cup atema kodanga qualify mesüaka taküm iba asayamung mapang fans tem raratepba, kotari agi atsüngba, züksetba mesüra football benjongdang tia maka ajurua asüba ajangshia arutagi.

Tang tesüsa asüba ya Nilphamari’s Jaldhaka upazila nung Uttar Cheranga yimtsüng nungi arishi küm 38 tain Mohammad Shariful Islam alitsü, shiba mapa bushia ita ti shi tejakdang Cumilla-i ao.

Pa ya e-rickshaw anir ka liasü aser television nung Argentina aser Egypt asaya reprangba mapang tilateri nung mangatettep adoka zükset ta ashir.

Bushisüngdanger temi ashiba agi, Islam ya asaya mapang yangji aliba lanur kar den tebang agi asatepa liasü. Ajisüaka kanga keraa azüdokshi aser pa mapang tatsüka lir iba rongrongshirong mapang yiruba zübu ajanga asü.

Iba mepetmesü ya Cumilla indang Adarsha Sadar upazila kübok Dhanpur nung Mohsin Mia indang dokan nung Mongulbar aonung ayatirm tongli atalok.

“Komasür nisungtemi football match ka mechi nisung kar tepsettsü? Ni jala ana lir. Tang parnoki shiba dang tebu ajatsü? Ozü jala ana lajar kumogo. Kü kinungbo tepseter nem temerenshi tesashitiba agütsüdaktsüner,” ta pa kinungtsü Beauty Begum-i nüktzü yima ashi.

Ajisüaka Bangladesh nung World Cup mapang iba ama tia ajuruba ya Shariful Islam kisüng masü.

June 29 nü Brazil aser Japan asayaba mapang Ashulia nung mangatettep adoka arishi küm 15 tain Nahid Hasan kotari agi tsüngset. Par kinungeri ashiba agi, Brazil bhukumer nisung pezü arua pa par kidang nungi mesüzüka anir ao aser tepseter pa tasümang ya lisem nung rema yutsü.

Ano anogo ana lir July 1 nü Brazil aser Japan asaya dak sendakba nung mangatettep adokba sülen Dhaka kübok Adabor tesem nung arishi küm 30 tain BNP lenir Abul Bashar Badshah lepset. Yangji alirtemi mangatettep bentettsü mokoki tensa tamajungba akum ta ashir. Külem BNP activist Saddam Hossain iba lendong nung kanga sashia yiru.

Asürtem ajakbo telok balala tsüngta raratepba ajanga masü.

Tesem balala nung nisung asem pei sapuba team indang nisan asongdang light agi puseta asü.

School azünger Mahin Sheikh ya Mymensingh kübok Gafargaon tesem nung June 19 nü Brazil indang nisan asongdang light nung puseta asü. Ramhari Baishnab ya Chattogram nung June 15 nü Argentina nisan asongdang asü aser June 9 nü Faisal ya Manikganj nung Brazil nunger nisan asongdang puseta asü.