NBCC-i CM Rio dang FCRA Amendment Bill anema ola adoktsü ayongzüker

Dimapur, July 10, 2026 (TYO): Nagaland Baptist Church Council (NBCC)-i Foreign Contribution (Regulation) Amendment Bill, 2026 magizükba metetdaktsüogo.

Chief Minister Neiphiu Rio-i Centre den iba onük lemsateptsü ayongzüker kechiyong iba Act ajanga arogotem, Khristan rejutem aser tenla agüja inyakba teloktem dak kanga mejungi kongshitsü ta NBCC memorandum ka züluogo.

State sorkari iba Amendment Bill anema noktaktsüla. Senotsü tashishitsü melii amshitsüba aser national security asoshi bilemtsüba ya tim dang saka iba Bill ajanga chichiba tamangba yimsü dak sendakba teloktem madak “excessive restriction” alitsü akok ta NBCC-i CM Rio dang shiogo.

NBCC nung Baptist associations 21, associate members 4, congregations 1,626 aser baptised members 7.48 dena lir. Nagaland nung arogotemi küm 100 tema sorkar den yaritepa education, healthcare, peacebuilding, disaster relief, youth & women’s empowerment, de-addiction programmes aser services nung yaritepa arur ta parnokisa metetdaktsüogo.

Ozüngi melaba ama foreign contributions aruba ajanga ministry temi maparen balala inyaka arur, talisa meta talang pilar alidak aser rongsenketzüng tsütsü tangar memenepertem yarir ta NBCC-isa metetdaktsü.

FCRA Bill, 2026 ajanga arogotem aser tenla mapa inyakba rejutemi timleni aruba foreign contributions agizükba nung tenokdangtsü agütsütsü akok, arogo tilatem & grassroots ministries nem compliance burdens talila agütsütsü, global Christian organizations den tesentaktep raksatsü aser tanurtem, tetsürtem, persons with disabilities, teintet rogotem aser sensakertem ajangzüktsü atema inyakba mapatem nung kongshitsü ta parnokisa CM Rio dang ashi.

Iba Act ajanga telok ka indang FCRA registration agienra bangdakpurtemi iba telok indang rongsen madak kibur akümtsü ana nung lir ta NBCC-isa metetdaksüogo.

Kerala Legislative Assembly-i Centre sorkar dang amendments meyipa agitsü ayongzükba ama Nagaland state sorkar aser state Assembly-i iba mesükba bangzüng renemtsü ayongzüker ta parnokisa ashi.

Arogotem ya tamangba yimsü rejutem dang masü saka foundational social institutions lir aser Nagaland nung shisaluyimba, sobaliba aser meimchir tsütsü temelenshi bentsür aruogo ta NBCC-isa metetdaktsü.

Item amendments ya linük temzüng tsütsü jungjunga reprangdangtsüla kechiyong Arrla 25, Arrla 26, Arrla 29, Arrla 30, aser Arrla 371A ajanga iba temeten agütsür. Nagaland state sorkaria iba Act ajanga Naga nunger tamangba yimsü aser lokti rejutem dak kongshir asü masü asadangtsüla. Nüngdakra state sorkari Centre dang amendments reprangshiang ta rongshitsü akok mesüra okadak nungi osang tejangja meshitsü akok ta NBCC-isa metetdaktsüogo.

Chief Minister Rio-i Prime Minister Narendra Modi aser Union Home Minister Amit Shah na den iba tebilemtsü lemsatepa Bill meyipa agiang ta rongshitsüla ta NBCC-isa ashi.