MCTE nung ki tasen semzükogo

Dimapur, Luroi/August 14 (TYO): Mokokchung College of Teacher Education (MCTE) nung Minister for Higher Education & Tourism, Government of Nagaland Temjen Imna Along-i academic ki tasenba semzüktsüogo.

Sentong nung o jembiba mapang Minister Imna Along-i, MCTE ya state asoshi takok tulu ka ta shia, jenjang aketba kaketshisatsü angazüktsü asoshi Nagaland aser tangalen nungi kaketshirtem iba college ajanga ajangzüktsü, ta ashi.

Iba riju maneni renloka aotsü imla ataba lemsatepba den Minister-i, Higher Education Department kübok terenlok maparentem indang lemsatep, kong PM-USHA scheme kübok MCTE nung yipden 40 aketba tetsür hostel ka, Mangkolemba nung Model College tasen ka yanglutsüba aser district balala nung project balala inyaktsü aliba densema lir.

Maneni pai taoba mapang aser tang tinyakdak aliba tesayurtem nem tenüngsang agütsü aser parnok ya sepaitem mesüker shirnoki parnok mapang, teka aser tebilemba kaketshirtem anitettsü aser asen lokti tarutsü yangertsü atema bendanga agütsür, ta ashi.

Minister-i nüngshilong lapoktsüba sülen sentong tenzük. Iba sentong ya MCTE Assistant Professor Sekulu Nienu lenisüba nung agi aser MTBA Pastor Rev. Temsuwati-i ki meshiteta sarasademja liasü.

Sentong nungsa MCTE Principal Dr. T. Alemla Longkumer-i lokti pela agizükba o jembi aser iba sülen kaketshirtem aser tesayurtemi “Tangula Tasen (New Breath)” ken tena liasü.

Maneni sentong nung Directorate of Higher Education nungi Joint Director (Planning, Budget & Accounts) Dr. Hukato Swu-i o tatsüka jembi aser  Executive Engineer of PWD (Housing), Education Division, Kohima-i technical report agütsü. Sentong ya Assistant Professor aser IQAC Coordinator, MCTE Kerilhusa Peseyie-i tepela o jembir tembanga liasü.