Metsubo-i Tuli nung tzümetsüng agi kongshir aliba tesem semdang

Dimapur, Luroi/August 14 (TYO): Minister for Rural Development & SIRD, Metsubo Jamir den Advisor for Fisheries & Aquatic Resources, A. Pangjung Jamir, aser Advisor for Information & Public Relations, Soil & Water Conservation, Daochir Imchen nungeri August 13 nü Tuli kübok tzümetsüng agi kongshir aliba tesem balala semdangogo.

Kasa anogo Tuliyong Community Hall nung administration, kiyong aser yimtsüng balala nungi Council Chairman tem den senden ka menogo.

Senden nung tesemdangertemi, tzümetsüng arur aliba mapang aser tzü asemshia aoba sülen ken o dak sendaka aliba lokti tentet balalai takaratiba nung jenjang tapet agiba atema tenüngsang agütsü, aser tarutsü nunga iba amala timtem lendong balala atalokba mapang mulungsoa teyari agütsütsü asoshi ajungshia liasü.