Kumlong ward pur community hall tasen yangluogo

Mokokchung, 14th Aug (TYO): Nagaland RD & SIRD Minister, Metsübo Jamir-i Mokokchung town kübok Kumlong ward pur Community Hall-cum-Amenity Centre tasen asüba ka lapoktsüogo. Iba ki ya “Iconic Project 2025-26” kübok sen crore 1.8 shi intoka renem ta kisür luden ajanga metetdaktsü. Kümlong Baptist Arogo Pastor, Kikum Longkumer-i iba ki meshitettsü.

Iba ki ya taoba mapang community hall, youth hall aser Sub-Centre ama amshia liasü, item ki tejenbato bentoker tasen küma yangluba lir. Kiji modern design nung ki tesatem den metsümeshiba aser nüngdakba balala keta yangertetogo.

Tesemdanger tongti Metsübo-i jembidang, ki asütsüba ya mapa temela masü saka asenok lungjema aser putepa aliba ajanga iba ya takok ngua yangertetogo, iba ki ya asenok meyong lir, anungji, tamshi shia aser meima anepalutsü asoshi pai mepishia metetdaktsü.

Iba ki ya pa aser par kibong konang bushitsü atema sütsüba masü, saka ibai kiyonger konang aser telungjem mapa ka lir, aser ibai tangar tsüngdang nüma tangtettsüba mapa ka lir, anungji, tangari junger ta shitettsüsa tang amai asenok lungjemer mapa balala inyaktsü asoshi pai ayongzük.

Paisa teinyaktsü mapatong ka lemsatepdang, Kumlong ward nung ano amphitheatre ka yanglutsü asoshi mapatong ka benoka lir, anungji, ibajia tekaratiba nung mapa akümtsü imlaa atar, ta ashi.

Sentong nung Mokokchung Municipal Councilor Satemkala, Kumlong ward chairman Imtitoshi Jamir, Construction Committee luden nungi C. Tia Longkumer, Kumlong ward Secretary K. Wati Aier parnokia shilem balala agia jembi. Shilem agir balalai Minister Metsübo-i Kumlong nüburtem asoshi ki tajung yangertsüba asoshi pelaba lemsatep.

Mokokchung Deputy Commissioner Ajit Kumar Verma IAS, Sr. S.P Vesupra Kezo NPS den sarkar ketdangsürtem, Ungma yimden, ward balala nungi yimden yimsüsürtem aser telok balala nungi tongtibang nübu aika adenshia iba ki lapokba sentong kanga meraketa agia liasü.

Kumlong ya 27 Mokokchung Town Assembly Constituency kübok ward rongnung ka lir. Tanüngba ward pezüji – Kichutip, Aongza, Salangtem aser Mongsenbai lir.