Nagaland nung I-Day atema security akangshiogo

Kohima, August 14, 2026 (TYO): Nagaland nung Independence Day jakdang security akangshiogo aser State Police-i hopta ka tema Assam Rifles aser CRPF den yaritepa arudar ta Nagaland Additional DGP (Law & Order) Sandeep M. Tamgadge-i ashi.

Nagaland nung Independence Day nung tensa azüoka ayutsü aser sentongtem tiptema agitsü Tamgadge-i ashi.

Naga Students’ Federation (NSF) aser parnok federating units-i National Song, Vande Mataram tetuyuba anema Independence Day mokdangtsü ayongzükba atema asüngdangdang  “teloktemi voluntary temepishibatem dang agütsü” ta Additional DGP-i langzü.

Tashiyim agi benjungmung nung madentsü noktangba ken o kecha police tsüngdang benoka mali. Ibala ken o benokra mapa inyaktsü ta Tamgadge-isa shisem.

Independence Day ya linük sentong ka lir aser senso ajaki iba benjungmung adentsü mepishir ta paisa metetdaktsü.

National Song (Vande Mataram) atentsü yim metetdaktsür

Nagaland nung 80 buba Independence Day amungtsü sentong tajung renemogo aser Kohima nung anepdang 9:00 ako nung Nagaland Secretariat Plaza nung iba sentong agitsü.

Iba sentong nung Chief Minister-i National Flag atsükettsü aser State Police, Para Military Forces, Home Guards, Ex-Servicemen, NCC tangartemi Guard of Honour aitsü.

Districts aser Sub-divisions nung Deputy Chief Ministers, Ministers, Advisors aser pei pei ADCs/SDOs-i National Flag atsükettsü aser Rashtriya Salute agitsü.

Taküm Independence Day atema Ministry of Home Affairs, Government of India-i tuyuba ama Chief Minister tesem tonga aruba sülen National Song (Vande Mataram) atentsü, iba sülen National Flag atsükettsü aser National Anthem atentsü.

Chief Minister-i o jembiba sülen National Song (Vande Mataram) maneni atentsü aser iba sülen National Anthem atentsü.

District aser sub-division tem nung Independence Day sentongtem nunga MHA-i tuyuba ama inyaktsü.

Sentongtem nung National Song (Vande Mataram) atendang tesentepertemi National Anthem atendang noktakba ama noktaktsü.

Kohima nung State level sentong ya State IPR Department ‘DIPR Nagaland’ indang official YouTube channel nung Live sayutsü.