Phesama nung Mini World Cup tenzükogo

Kohima, Luroi/August 14 (TYO): 8buba Phesama Mini World Cup Honibarnü St. Paul School Ground, Phesama nung Kohima Municipal Council Ward 19, Councillor Medoviu Martin Suohu -i lapoktsüogo. Iba asayamung ya “Connecting Phesama,” omen nung ajemdaker asayadar.

Asayamung ya FIFA World Cup indang replica ka lir aser iba ajanga Phesama nung football asaya jangrartem longjemdaktsütsü aser lokti telongjem tali akangshidaktsütsü. Phesama kübok kiyong pezü nungi team trok iba asayamung nung shilem agitsü aser team trok yagi  Italy, Argentina, England, Japan, Brazil aser Spain uniform tem asemtsü.

Sentong nung o jembiba mapang tongti tejaoker Suohu-i, asaya ajanga nüburtem longjemdaktsüba atema asayamung ayongertem dang kanga pelaba lemsatep. Paisa, asayamung ajanga telongjem adokdaktsüba ngua kanga pelaba lemsatep.

Football asaya ya kanga nüngtugu asaya ka ta shia Suohu-i, asaya junga asayatettsü asoshi angatetpa asayatsü, asayar liromedemtsü aser teamwork den pusemertem nüngdaker ta ashi. Paisa, asayamung ayongertem dang tarutsü nunga iba asayamung ya maneni tajungba ayongzüka asayatsü ajungshi.

Asayamung lapokba sentong nung Vizokho Zashümo-i o jembiba mapang, Phesama Mini World Cup ya yimtsüng nung kanga tongtibang asayamung ka kümogo, aser iba ajanga lanurtem aser football asayatsü jangrartem longjemdaktsüba dang masü saka telungjem aser sempet aketba asayartem ajungketer, ta ashi.

Sentong nung tongti tejaokeri wako salatsü aser asayamung lapokba sangdonga liasü.

Asayamung lapokba sentong ya Organising Committee Convener Thejanguzo Zashümo lenisüba nung agi, Fr. Rajesh Lobo SJ, Parish Priest aser St. Paul Institute of Education Principal Fr. Rajesh Lobo SJ-i sarasadem aser Menuoselie Zashümo-i omen ken tena liasü.

Asayamung ya Honibarnü tembangtsü.