International Peace Poster Contest 2026 nung shilem agitsü jaoker

Dimapur, Rongjui/Sept. 18 (TYO): International Lions Club of Kohima ajanga Kohima nung aliba kaket rejutem Lions International Peace Poster Contest 2026 nung shilem agitsü jaokogo, koba October 3, 2026 nü Rüzhükhrie Government Higher Secondary School, Kohima nung agitsü sentong lir.

Iba tetoktepba ya tanurtem November 15, 2026 tashinung arishi küm 11, 12 mesüra 13 alirtem asoshi lir. Kaket reju shia-i kaketshir ka-ka iba tetoktepba atema shimtsü akok. Shilem agirtem nem “Harmony in Humanity” omen nung ajemdaker poster ka yangludaktsütsü.

Iba tetoktepba yagi tanurtem art ajanga yimjung angatetba aser mangdang lemsateptsü maongka agütsütsü.

2026-27 omen ajanga lanurtem dang sobaliba aser jenjang balala nungi nisungtem yimjung nung külemi alitsü atema bilema aliba lima ka yanglutsü ajungmesor. Iba den külemi akhümtsübutep, temeim sayuba, tangatettep, taremzüktep aser amalitep ajungkettsü atema ayongzüker.

Iba tetoktepba ajanga tanurtemi anogoshi taküm nung yimjung tongtipang indang shisadangtsü aser parnok shisatsü amshia temeim, akhümtsübu aser tesünep aliba yimya ajungkettsü atema ajungmesotsü meranger, ta International Lions Club, Kohima ajanga ashi.

Local level nung takok angur nem Club-i senpet sen 10,000 den takok anguba sempet aser kulizüng kaket tem agütsütsü.

Local contest sülen takok anguba poster ya ano district aser international levels atema yoktsü. International level nung International Grand Prize Winner ya iba sempet agütsüba tesemi aoba den sen US$5,000 den sempet angutsü. Iba den ano Merit Award Winners 23 nem sen US$500 den takok anguba kulizüng kaket agütsütsü.

Iba sentong nung shilem agitsü jangra aliba kaket reju temi Lion Max Menuose-O, Secretary & Contest Chairperson, Lions Club of Kohima den mobile numbers 7085774704 / 9077707345 ajanga tongteprateptsü akok.