Mokokchung DPDB-i Changtongya nung Fire Station yanglutsü melaogo

Dimapur, Rongjui/Sept. 18 (TYO): Ita shia amenba Mokokchung District Planning and Development Board (DPDB) senden DPDB Chairman aser Minister, Rural Development & SIRD, Metsübo Jamir lenisüba kübok September 18, 2026 nü Deputy Commissioner, Mokokchung indang Conference Hall nung mena liasü.

Senden tenzüka Deputy Commissioner and Vice-Chairman, DPDB Mokokchung, Ajit Kumar Verma, IAS-i pela agizükba o jembi.

Parnoki taoba senden nung lemtetba tem lepa reprangtepba sülen District Tuberculosis (TB) Office ajanga inyakba Nikshay Mitra sentong indang jembi aser TB agi shiranger timba akumba mechi tenlar tali bushitsü indang parnoki jembia liasü.

Board züngsem temi Changtongya Town nung Fire Station ka yanglutsüba onük agizüka tim department dangi yoka liasü.

DC-i Reform Utsav 2026 inyakyim indanga tongmelang agi lemsatepa liasü, koba tajungba nung sorkar mapa inyaktsü aser nüburtem nem service tajungba agütsütsü asoshi lir.

District Horticulture Officer, Dr. B Temjenmenla-i PowerPoint presentation ka ajanga district nung department-i scheme aser maparen balala inyakba indang lemsatepa liasü.

Minister Metsübo Jamir-ia Public Finance Management System (PFMS) indang lemsatep aser ketdangsürtem dang digital payments indang junga meteta alitsü aser ano sorkar inyakyim, schemes aser protocols junga metettsü ayongzüka liasü.

Pai züngsemtem dang shisatsü tasen bener a rutsü aser grassroot level nung iba ama inyakyim jangjateta tushitsü ajungmeso.

Minister-i ketdangsürtem dang sorkar indang offices aser staff quarters tem kanga anepalua amshitsü shia liasü.

Iba senden nung Department of Environment Forests and Climate Change indang Toll-Free Helpline ka Minister-i semzükja liasü.