Kohima Police-i ‘SLATE’ mapatong tenzüktsü

Dimapur, October 3 (TYO) : October 5, 2015 anepdang 10:00 ako nung Kohima Police-i PHQ conference hall Kohima nung “SLATE” ta ser sentong ka agitsü.

“SLATE” ta asüba ya Students Law and Traffic Education lir aser iba sentong nung school trok – (1)Baptist Higher Secondary School, (2) Mezhur Higher Secondary School,(3) G. Rio Higher Secondary School, (4) Vineyard School, (5) Razhukhrie Govt. Higher Secondary School aser (6) Little Flower Higher Secondary School nungi kaketshir 120 shi ka den tesayurtem adentsü imlar.

Kaketshirtemji tarutsü lennirtem lir aser iba nung ajemdaker parnok dang traffic laws, Cyber crime aser general laws sayutsü nükjidong nung iba sentong ayongzüker, ta Sub-Divisional Police Officer & PRO, Kohima-i sangdong ka nung metetdaktsü.

Tarutsü anogotem nung college aser university kaketshirtem nema tesayuba agütsütsü aser iba mapatong kübok tanabuba shilemji “Safe – Street” alitsü, ta sangdong nungsa shia lir.

October 5, 2015 anepdang 10:00 ako nung “SLATE” tenzükba sentong agiba sülen refreshment mapang alitsü aser iba sülen “Traffic Awareness” & “Cyber Crime” onüktem nung kaketshirtem essay competition ka alitsü.

Item tetoktepba nung mezüngbuba jenjang takok angur nem Rs. 5000, tanabuba nem Rs. 3000, aser tasembuba nem Rs.2000 senpettem den Director General of Police, Nagaland-i sign asüba kulikakettem agütsütsü.

Kasa sentong nung DGP Nagaland-i PHQ Police Point Kohima nung LED display board ka sayatsütsü.

October 5 nü sentong agiba sülen October 6 nungi 9 tashi DEF Kohima nungi ketdangsertemi temalen agüja aliba school tem nung Cyber crime, General laws aser Traffic education indang onüktem nung ajemdaker power point presentation ajanga tesayuba agütsütsü, ta Sub-Divisional Police Officer & PRO Kohima-isa sangdong nung metetdaktsü.