Education Conclave 2026 nung North East  nunger shisalemsateper

Dimapur, September 18, 2026 (TYO): Nagaland nung tanü nungi anogo ananü Education Conclave 2026 tenzükogo.

Hokolbarnü JP Park, Naga United Village Chümoukedima nung ‘Implementation of NEP 2020: Vision, Challenges & Opportunities for the north eastern states’ omen nung iba sentong tenzük. Iba sentong nung North Eastern region nungi policymakers, educators aser administrators adenshia shilem agir.

“Asenoki mangdang tajung ka renemtsü aser inyaksangshia aotsü lenmang yanglutsü atema adenshiogo. NEP 2020 takok ngua inyaktsü atema asenok policy ka renemtsü aser shisatsü lemsateptsü atema aruogo” ta Higher Education & Tourism Minister Temjen Imna Along-i ashi.

“Tanü tayongzükba agi sünger aliba lima ka nung degrees ajanga mapa mangur. Nenoki shisaliok sayuba ajanga koba tashi kongshir aser kechi adoker ta asüngdanger. Asenoki kanga arokaroka shisadangtsüla” ta pai ashi.

“Nagaland nung alir 98% tashi Khristan yimsü sülen anidaker aser kasaji Mizoram aser Meghalaya nunga lir. Asen universities nung Christian studies dendaktsü nung koda? Ibaji arokaroka shisadangba masü na? Muslim universities aika nung Islamic studies lir anungji Nagaland, Mizoram mesüra Northeast nung Christian studies tenzük nung koda? Asenoka iba India linük nung sensotem masü na?” ta Imna Along-i asüngdang.

“Linük nung küm ti tashi Madrasa studies indang jembia arur. Iba ajanga linük yangerba nung kongshi asü mekongshi? Iba linük nung tanga tamangba yimsütema curriculum nung adentsüla. Ni tenla ki mesüra masjid mesüra mandir atema masü saka curriculum atema jembir” ta paisa ashi.

Minister Along-isa Chief Minister Neiphiu Rio ajanga yokba shidi zünga metetdaktsüdang “Education Conclave ajanga olemtep tajung alitsü, tebilemba lemsateptsü aser ajangshia arubatem ashitsü sabang ka agütsür. Iba ajanga education sector nung maongkatem aser tayongzükbatem lemsateptsü” ta ashi.

Iba mungdang nung asenok indang educational ecosystem tashi aittsü atema shisatsü angutsü aser asen lanurtem nem knowledge, skills, values, aser confidence agütsüba nung yaritsü ta CM Rio-isa ashi.

“NEP 2020 ya education policy ka dang masü saka asenoki shisaliok atema bilemba nung temelenshi ka lir. kaketshirtemi pei oshi, sobaliba aser inyaksangshi den sendaktepa alitsüla aser kasa mapang nung parnoki iba putu tasen nung artificial intelligence, digital technology, research, innovation, entrepreneurship, aser skills angazüktsüla. Iba ya Northeast atema maongka tulu ka lir” ta Minister for Panchayats, Higher Education & GA Tripura Kishor Barman-i ashi.

“Northeast India ya India nung talangka pilar aliba kinük ka masü. Northeast India ya India asoshi tongtipang tashi ka lir, shisatsü, sobaliba, purapitetba aser human resources nung tashi tuluka lir. Asen teraji asen li nung teti yanga alitsü saka asen mangdangtemji alima dak rangloktsüla” ta pai ashi.

“Asenok ajaki mangdang ka, mission ka, Northeast nung lanuputu atema mapa ka aser 2047 tashi nung developed India atema külemi inyakdi” ta Barman-isa ashi.

“North East Council (NEC) kübok north east Education Minister tem senden anaben ali nung ajungtsü. Iba ajanga stat ti nungi scheme mashi ka atema joint submissions agütsütettsü aser asen nüngdak peritettsü” ta Mizoram nungi School Education Higher & Tech. Education, IT Minister Dr. Vanlalthlana-i ashi.

“Asenoki NEP, RTE maparen tenzükogo saka item inyakyim teimbaka plain areas atema renemba lir. Asenok hilly areas asoshi index balaka alitsüla, Northeastern states asoshi balaka alitsüla. Ano asenok asoshi hill area construction norms balaka latettsüla kechiyong centre sorkar nungi funds lemzükba ajanga school tajung yanglutsü kanga tasak lir” ta pai ashi.

“State ti shia nung sorkar school tem nung tazünger mali akümer, enrolment lemzükba dang nungibo sorkar school nem lemzükba teimba lir. Manipur nung school tem nungi sorkar school 60% shi lir saka enrolment bo 31% dang lir” ta Dr. Vanlalthlana-isa ashi.

Nagaland nunga schools ajak nungi 80% ji sorkar school tem lir saka enrolment bo 33% dang lir. Mizoram nunga iba amaji dang lir anungji state 8 nung medemdangdang 6 nungbo government education enrolment majung lir ta paisa metetdaktsü.

“NEP ya skill aser knowledge sendaktepba lir anungji university temi shisatsü den skill sendakteptsü atema kanga merangtsüla, kechiyong shisatsü kijai dangbo mapa inyaka moutettsü” ta Assam Education Minister Dr Ranoj Pegu-ia ashi.

Putu 21 buba nung skills tetezüji IT literacy, media literacy aser technology literacy. Nisung ka commerce, humanities, commerce, medical science kaketshir asütsü akok saka AI kanga nüngdaker ta pai ashi.

MLA & Advisor to HME Arunachal Pradesh Mutchu Mithi-ia tanü education sector nung aibelentem ajanga tarutsü nung kanga mejungi kongshitsü ta ashi.

Nagaland University nung Vice-Chancellor Jagadish K. Patnaik-i jembidang National Education Policy (NEP) 2020 den putepa Northeast nung contextual aser inclusive educational transformation nüngdaker ta ashi.

“Northeast ya contextual, inclusive, & knowledge-driven educational transformation atema model akümtsü koka lir” ta Dr. Patnaik-i ashi.