AKTB-i Bengaluru nung nüburtem saksalemtsü ayongzüker

Dimapur, Mongputeni/Oct. 09 (TYO): Ao Kaketshir Telungjem Bengaluru (AKTB) ajanga Bengaluru-i arutsü sentong/tebilemba aliba Aor ajunga dang yimti nung taila company tem mesüra mapa dak sendakba nung ashikülak mapa inyakba tali akumba aser mapa bushirtem dak tenük yoker tim masüba mapa inyakba indang kumdangtsü metetdaktsüogo.

Mapa inyaktsü maongka agütsüba magizükdang mesüra Bengaluru-i marudang item company mesüra organisation kanga junga jangjateptsü ayongzüker, ta AKTB tir A Sentisenla Imsong aser tongti zülur Yimoakok Longkumer nati sangdong ka nung ashi.

Kaketshir aser mapa inyaker arishi küm 34 aser tekübok alirtem AKTB küboki aittsü AKTB indang Constitution nung lir. Anungji Bengaluru-i arutsü sentong aliba Aor ajunga dang yimti tonga aruba den külemi tenüng züluokdaktsütsü ayongzüker.

Registration agiba ajanga AKTB office-i nenok den osang agiteptettsü aser nüngdakba mapang lenmang tapet sayua yaritettsü.

AKTB nung register süa malirtem den union-i yariteptsü lenmang mesademer. Anungji ajaki saksalema item ashikülak mapa mesüra tim masüba mapa inyakba nungi jenbua alitsü ayongzüker, ta sangdong ajangasa ashi.