Nagaland-i küm pungu nung education reform meranger

Kohima, October 9, 2026 (TYO): Nagaland-i sorkar school tem jenjang tajungba kümdaktsütsü atema domestic aser German philanthropic organisations den tesentaktep yanglur.

Iba ya digital learning, teacher training, early childhood education aser vocational skills atema lir.

“State sorkari Rotary Club of the Queen’s Necklace, Mumbai president Nikunj Jhaveri aser Germany-based Childaid Network Foundation president Martin Kasper-i aniba -i teshimtet telok ka den ajurutepa jembiogo” ta School Education Advisor & MLA Kekhrielhoulie Yhome-i ashi.

Iba teshimtet telok ya October 5 nü Nagaland-i aru aser school tem semdang aser sorkar department tem den shisaliok jenjang tajungba akümtsü aser classroom nung technology amshitsü indang onüktem lemsatep ta pai ashi.

“Onoki mapang talangka tesentaktep yur inyaka aotsü lenmangtem bushiteper” ta Yhome-isa shisem.

Nagaland sorkari budget nung 8.3% nungi 8.7% tashi education nung endoker saka public resources tajungba amshitsü lenmang lir. Sorkari senotsü jenjang asadangtsü aser corporate sector nung ajangshia aruba partners nungi angazüktsü mulunga lir ta pai ashi.

Iba mapa ya tajemba agia küm pungubosa inyaktsü aser iba nung sorkar school tem tajungba akümtsüba nung temulung agütsütsü ta Kasper-i ashi.

Childaid Network ya private non-governmental organization ka lir aser parnoki Northeast nung küm 20 shi ka inyaka arur aser tang Northeast nung mapatong 1,500 shi inyaker.

“Onoki küm nung 2 million nungi 3 million euros shi ka education nung endoker aser iba ya teaching quality tajungba akümtsü aser sorkar school tem nungi tajungba angazüktsüba asoshi amshir” ta Kasper-isa ashi.

Tesüiba küm 20 tsüngda Nagaland nung school enrolment aser infrastructure junga kümogo saka learning outcomes atema tebilemtsü lir ta paisa shisem.

Nagaland nung government school system nung kaketshir tesadang nungi teküpoki Class 10 examinations nung takok nguogo aser iba ajanga teaching aser learning tashi itshitsütsü nüngdakba sayur ta paisa metetdaktsü.

“Iba tesentaktep ajanga domestic and international philanthropy, corporate networks aser local organizations yaritepa Nagaland nung education reforms pusema nungittsü. Onoki cheques dang zülur magütsütsü saka mapang shia semdangtsü aser senotsü koma amshir reprangtsü aser Nagaland ya corporate-sector opportunities den sendakteptsü atema yaritsü” ta Jhaveri-ia ashi.

Iba long-term vision ya lanurtemi tangalen mapa inyaktsü bushi moi Nagaland nung dang pei tarutsü yangertsü atema maongkatem agütsütsü atema tenzükba lir, ta Kasper-i ashi.

Company temi Kohima mesüra Dimapur nung centres amenoktettsü aser iba ajanga local jobs adokba den skilled Naga professionals-i pei state nungi dang mapa inyaktsü imlar ta paisa ashi.

Childaid Network ya pa aser pa kinungtsü nati tentetba private NGO ka lir saka German sorkaria maparen balala nung senotsü agüja yariteper ta Kasper-isa ashi.

Iba mapa ya Mantra for Change, ShikshaLokam aser Elevate dena local organizations den amalitepa inyaka aotsü aser sorkar school tem tajungba kümdaktsütsü.