Ojala tsüngrem !

Hindu yimsü o Khristan yimsü na tetsüngda kaji, Khristan –tem asoshi Tsüngremji tebu lir, anungji Tsüngrem dang oba ta ajar, ajisüaka Hindu nungertem asoshibo tsüngremji tetsü lir, anungji oja Durga (Durga Maa) ta ajar. Adangji, Tsüngremji obala dang masü saka ojalaa asütsüa akok, aji kecha masü, kechiyong Tsüngremji Tsüngrem, aji nisung kolok agi angatettsübo tasak. Ajisüaka, yimsü ana tetsüngda ya Khristantemi nisung  tenük agi manguba taküm Tsüngrem tamang agi külemer saka Hindu nungertemi nisung teka agi yangluba süngyanglu tenük agi ngua külemer. Aji oda, tang ama Hindu nunger tamangba yimsü benjong ‘Durga Puja’ amongba mapang ya parnok benjong amongdak sü ki ajak nung sen aika jenjang süngyanglua tapu balala yur itemji külema benjongteper. Item süngyanglutem ajakji tebur masü saka tetsür asütsü, kechiyong itemji Ojala Durga (Durga Maa) lir. Hindu nungertem asoshi Durga ya  jala tajung ka aser tetsü tajung ka dang masü saka ano temenen tamajung koktetba nokinketer ka lir. Aji oda, Hindu nunger tar otsü nung ashiba agi, Durga tsüngremi jang shiruru ama temenen Mahishasura tepsetba takok jagi temenen madak takok tulu angu ta züngshir.Iba takok benjongji Durga Puja ya lir. Durga Puja tetezü Durga külemba mapang lir. Ashiko, asenok Khristan purtem Arogo Zonizüng ( Arogo Calendar) nunga karibo Durga Puja nung sodi enoka agitsü asoshi ‘Durga Puja’ ta enoka alitsüa akok, tetezüji arogo nungertem asoshia iba anogoji Durga külemba anogo asütsü shimtetba amai adoker, anungji kodang aji jungjunga bilemdangdir,Arogo calendar nung Durga Puja ta enoka alibaji mapet aser shitak masütsü. Hindu nungertemi amangbaji, ojala Durga tsüngremi par chir pezü Lakshmi, Saraswati, Ganesh aser Kartik anir küm nung khen alimai alua anogo pungo amongtsü alur. Item anogotemji takzüa lir ojala Durga tsüngremji külemtsü asoshi Durga Puja ya amunger. Atangji, iba Durga Puja ya tsüngrem külema amungba anogo dang masü saka kinunger aser medemertem den pelatepa amungba benjong mapang ka lir. Aji oda, küm piyong nisung ajak pei pei mapa nung meranga inyaka arur, iba Durga Puja benjong mapang yabo nisung ajak süoshia tasen agir pelatepa amungba mapang ka lir. Aji oda, benjong amungertem asoshi ojala Durga süngyanglu külemtsübaji kanga tongtibang asünungji, talisa West Bengal aser Assam state-tem nungbo sen aika endoka sü ki topur junga yanglur, yangji süngyanglua sen aika jenjang alia bener arua yur külemer. Iba jagi, süngyanglu yanglurtem asoshibo Durga puja mapang ya sen kanga junga aaba mapang lir. Iba Durga süngyanglu ya nisung mashie yanglur masü saka akhi mapang nungi süngyanglu yanglua aruba kin aser kibongtemi dang yanglur. Aji oda, süngyanglu ya  shitakba agibo Ganges  ayong nungi teptetba ali agidang yanglur aser tesüsa Ganges ayong nungsa endoker. Iba süngyanglu nung tenükbo Durga puja amongtsü anasa Mahalaya ta ajaba mapang tenzükba anogo nung dang süngyanglu yanglurtem rongnung tain kati yanglur, kechiyong iba anogo ya ojala Durga tsüngremi temenen madak takok ngur alimai alutsü tenzükba anogo lir ta Hindu yimsü amangertemi amanger. Joko, tanübo Durga Puja ya India nung dang masü saka India nunger alidak alima tesem ajaklen kanga lungsua amonger. Iba benjong yagi Hindu nungertem lungjemdaktsür aser nisungtem teka mapa agi inyakba sobaliba mapatem aika mesamadaktsüi benshir. Item mapatemji benjong amungtsü tekülem ki yangluba aser süngyanglu yangluba mapatem nung reprangtettsü. Adangji, Tsüngremji obala aser ojala, anungji obala aser ojala na pronglai asenok koda meim yamaji kati ka meimtepa alitsübaji India nungsa tenüngdakba asütsü.