CM Dr. Rio-i IMDH atema ambulance aser hearse van semzüktsü

Dimapur, Mongputeni/Oct. 30 (TYO): Nagaland Chief Minister, Dr. Neiphiu Rio-i Imkongliba Memorial District Hospital, Mokokchung atema Advanced Life Support Ambulance aser Hearse Van semzüktsü, koba National Thermal Power Corporation (NTPC) Limited, Eastern Region-II Headquarters, Bhubaneshwar ajanga Corporate Social Responsibility (CSR) inyakyim kübok agütsü aser district administration-i ketdangsütsü. Iba sentong ya Commissioner’s Rest House, Mokokchung nung October 30, 2026 nü agia liasü.

Iba sentong nung CM Rio-i jembidang National Thermal Power Corporation (NTPC) Limited, Eastern Region-II Headquarters, Bhubaneshwar ajanga IMDH nem Advanced Life Support Ambulance ka aser Hearse Van ka agütsüba asoshi pelaba lemsatepa liasü.

Ibai pela agizüktsü inyakyim ka lir aser iba yagi district nung health services tajungba akumtsü aser nüburtem anema aliba tali tajungba akumtsü, ta pai ashi.

Kasa mapang NTPC-ia parnok aser state sorkar tsüngta teka amteper nübur ajangzüktsü asoshi health services tashi itshitsü aser yariteptsü temulungtetba lir, ta osang ka yoka liasü.

Deputy Commissioner, Mokokchung, Ajit Kumar Verma, IAS-i NTPC indang CSR inyakyim lemsatepba mapang Dr. Neiphiu Rio-i tanen makai yariba aser nüburtem nem service tajungba agütsütsü asoshi bureaucrats tem ajungshiba asoshi pelaba lemsatepa liasü.