Asayamung junga ayongogo

Nagaland nung aliba district-tem rongnung football asayatepba mung tulutiba  Dr.T.Ao Trophy- Inter District Football Championship Mokokchung nung kanga takok ngua ayongzükba asoshi kanga nümadanga bilemer. Adangji, Mokokchung ta süaka, iba asayamung ya Mokokchung town nungbo masü saka tatsüka pilar Renpo Lu Sports Complex, Ungma nung ayongzüka mungogo aser ano ajiang tajungba liasü, kechiyong Mokokchung town nung iba ama asayamung tulu ayongzük ka asünunga, Mokokchung town nung gari nungtepa ayuba agi shinga kechaia moutet timtem ajurula. Ibaji bilemdang, Mokokchung town nungi pilar asayadak tajung yangluybajiang teti asoshi tajung asütsüsa yanglutetogo ta yimsüsür aser ketdangsertem dang pelar aser asayamung menepa asayadak yangluteta asayamung takok ngua amongba asoshi Mokokchung District Football Association nema tenüngsang agütsür. Taküm küm asayaba Dr.T.Ao football asayamung yabo taoba kümtem asayaba dang nungi tongtibangba, 25 buba asayamung Silver Jubilee küm liasü aser jubilee mung shizüka kecha rongrongshirong aser timtem lendong mataloki lungsutepa mungogo. Adangji, akhi Mokokchung nung asayaba football asayamungtem indang bilemdangra, asayartem rongnung masü saka tereprangertem rongnungang rarabangsen adoka topur mejungi atemba anogotema liasü. Ajisüaka, tang Dr.T.Ao football asayamung  yabo benjong tulu amunger ama nübortem aika adenshia reprangtepba nung ya , talisa, lanurtem rongnung temelenshi tajung tuluka angur. Aji oda, pei lushi nung Naga nunger ajak adenshia asayar asünungji, iba khuret bena Ungma yimtenia yimyim tajung takang agütsüba agi, iba akhüm nung football benjong temenungratsüka sünepsünepa temogo. Mokokchung town ya Nagaland anüdok-anülulen na prongla asoshi tiyong nung amenoka lir, anungji aji meteta tang amaji asenoki sentong tulu tajung ayongzüka katetra, tarurtem asoshia tajung aser asenok asoshia tajangzük asütsü. Adangji, asayamung ama tangalen nungi nisung aika adenshia amungtsüsa ayongzüka sentong nükjidong ya lisopurtema senotsü nung ajangzüdaktsütsü asoshi bilema ayongzüker. Aji oda, sentong ayongzükertembo tebelemang kanga belemtsü saka lisopurtembo asayamung reprangi arurtem dang tzü, süngo aser chiyongtsü kisüng ayokba nunga senotsü aika ajangzüktsü. Iba denji ano aruagi asenok yimti nung anenzüka ayipba, chiyongba aser gari nung senzüba ajunga taaji asenok angutsü. Ibaji rajema tangarbo iba ama tangalen nungi nisung aika arua amungtsüsa ayongzüba sentong mapangbo yimtia kanga topur junga yanglur aser mapang endoka pelatepa amungtsüsa sentong balala renemer atar. Iba amaji asenoka tang Dr.T.Ao football asayamung nung nisung aika senotsü aika aa alitsü imlar. Ashiko, temulung nung bilemaka, rongsen maliba agi bilemba amabo merenemtet alitsü südi, iba jagi Mokokchung town nungbo police point dena tangar dang sayutsüsabo masüba tia ka nung nguogo. Adangji, asayamung asünungji koma ayongzük ta asüba dang nungibo, ano shirnoki akok ta asübajisa tongtibangba lir. Aji oda, football ama asaya yabo mapa temerang inyakba den kasa lir, anungji meranga inyaktsüla, timtem aremtsüla aser machimajemtsü nungi pilatsüla. Joko, tanü putu nungbo asaya ajak ya taküm lia aotsü inyakba mapa kümogo, anungji mapang endoka asayaba asaya ka masü saka football metsüba agi takar küma kibong mesütsüba mapa ka kümogo. Iba tangatetba nung, Nagaland government-i Dr.T.Ao football asayamung nung takoker nem agütsüba senpet sen yabo sen crore kabo asütsüla. Ibai asenok state akhüm aser tasayartema tasaya langa asütsü.