Longleng District Inter-Departmental Sports Meet 2026 tenzükogo

Dimapur, Mongputeni/Oct. 30 (TYO): Longleng District Inter-Departmental Sports Meet 2026 tenzükba sentong October 29, 2026 nü Multi-Purpose Indoor Stadium, Longleng nung “Unity, teamwork and physical well-being” omen nung ajemdaker agia liasü.

Iba sentong nung alakteta jaoker ama Deputy Commissioner Longleng, W. Manpai Phom, NCS aden aser Assistant Professor, Yingli College, Longleng, Daphne Chungphang menden liasü.

Sentong tenzüka Pastor, Police Baptist Church, Chingthai Phom, Longleng ajanga sarasadem aser ADC and Convenor Longleng, Thungchanbemo Tungoe, NCS ajanga pela agizükba o jembi.

Deputy Commissioner, W. Manpai Phom-i iba sentong nung jembidang, Inter-Departmental Sports Meet ya trophies angutsü mesüra matches akoktsü atema toktepba kisüng masü saka nüburtem lungjemdakja kati ka tali angatettepa aser temang anema aliba ajungkettsü asoshi lir ta ashi.

Ketdangsür aser staff tem departments balala kübok inyakaka department shia ya nisung temang ka nung shilem ka-ka ama inyaker aser sorkar tashi ita inyaktsü asoshi unit ajaki tongtipang shilem agir, ta ashi.

Tang takum aliba yimyatem reprangdangra, mapa nung mapang talanglang mener inyaker aser temang arakzüa inyaksangshiba ajema akumer, anungji nisung ajaki temang anema alitsüba nung temulung agütsütsü tali tongtipang akumer, ta ashi. Pai shilem agirtem dang iba saisapong sentong ya temang arakzüa inyaksangshiba, temang anema alitsüba aser department balala nungi külem tenzükertem tsüngta tesendaktep tashi itshitsüba maongka tajung ka ama agitsü ayongzüka liasü.

Iba saisapong sentong ya kati ka tali tajungba nung metettepba mapang ka ama agitsüla, kechiaser iba ama sentong yagi teamwork, kati ka akumtsüboa amshiba adokdaktsür aser sorkar mapa inyakertem tsüngta telungjem tali akangshidaktsür, ta ashi.

Sentong nung Yingli College, Longleng nungi The Chaos Crew ajanga tsüngsang ka agi shilem agia liasü aser District Sports Officer, Longleng, Kenongotto Thokhwe-i ketdangsüa tenangzükba agia liasü.